ന്യൂദല്ഹി- മെഡിക്കല് പ്രവേശനത്തിനുള്ള നീറ്റ് പരീക്ഷ മാറ്റിവെക്കണമെന്ന് കോണ്ഗ്രസ് നേതാവ് രാഹുല് ഗാന്ധി. വിദ്യാര്ത്ഥികളുടെ ദുരിതം കേന്ദ്രസര്ക്കാര് കാണുന്നില്ലെന്ന് കുറ്റപ്പെടുത്തിയ രാഹുല് വിദ്യാര്ത്ഥികള്ക്ക് ന്യായമായ അവസരം ലഭിക്കട്ടെയെന്നും ട്വിറ്ററില് കുറിച്ചു. നീറ്റ് പരീക്ഷ മാറ്റിവെക്കണമെന്ന ആവശ്യം സുപ്രീംകോടതി തള്ളിയതിന് പിന്നാലെയാണ് രാഹുലിന്റെ പ്രതികരണം. ഈ മാസം 12 ന് നടക്കുന്ന നീറ്റ് പരീക്ഷ മാറ്റിവെക്കണമെന്ന് ആവശ്യപ്പെട്ട് ഒരു വിഭാഗം വിദ്യാര്ത്ഥികളാണ് കോടതിയെ സമീപിച്ചത്.
സിബിഎസ്ഇ ബോര്ഡ് പരീക്ഷ, കമ്പാര്ട്മെന്റ് പരീക്ഷ, മറ്റ് പ്രവേശന പരീക്ഷകള് എന്നിവ സെപ്റ്റംബര് ആദ്യ വാരത്തിലും രണ്ടാം വാരത്തിലും നടക്കുന്നതിനാല് പ്രവേശന പരീക്ഷ നീട്ടിവെക്കണമെന്നാണ് വിദ്യാര്ത്ഥികള് ആവശ്യപ്പെട്ടത്. എന്നാല് 16 ലക്ഷം പേര് എഴുതുന്ന പരീക്ഷ ചില വിദ്യാര്ത്ഥികളുടെ ആവശ്യം പരിഗണിച്ച് മാറ്റിവെക്കാനാകില്ലെന്ന് കോടതി വ്യക്തമാക്കി.
