തിരുവനന്തപുരം- നോക്കുകൂലി ആവശ്യപ്പെട്ട് ഐ.എസ്.ആർ.ഒ കൂറ്റൻ ചരക്കു വാഹനം തൊഴിലാളികൾ തടഞ്ഞു. തിരുവനന്തപുരത്തെ വിക്രം സാരാഭായ് സ്പേസ് സെന്ററിലേക്ക് എത്തിയ വാഹനമാണ് തടഞ്ഞത്. പ്രദേശത്ത് പോലീസും നാട്ടുകാരും തമ്മിൽ സംഘർഷം ഉടലെടുത്തതിനു പിന്നാലെ പോലീസ് സ്ഥലത്തെത്തിയാണ് വാഹനം കടന്നു പോകാനുള്ള സാഹചര്യമൊരുക്കിയത്.
10 ലക്ഷം രൂപ നോക്കുകൂലിയായി ആവശ്യപ്പെട്ടുവെന്ന് വി.എസ്.എസ്.സി അറിയിച്ചു. ഒരു ടണ്ണിന് 2000 രൂപയാണ് ആവശ്യപ്പെട്ടത്.
നോക്കുകൂലി ശക്തമായി പ്രതിരോധിക്കുമെന്ന് സംസ്ഥാന സർക്കാർ വ്യക്തമാക്കിയിരുന്നു. നോക്കുകൂലിക്കെതിരെ ഹൈക്കോടതി ശക്തമായ നിലപാടെടുത്തതിനു പിന്നാലെയാണ് വീണ്ടും നോക്കുകൂലിയുടെ പേരിലുള്ള സംഭവം.