കൊച്ചി- മദ്യശാലകള്ക്ക് മുന്നിലെ തിരക്ക് സംബന്ധിച്ച് ഹൈക്കോടതി സര്ക്കാരിനോട് വിശദീകരണം തേടി. കോവിഡ് സമയത്ത് മദ്യശാലകള്ക്ക് മുന്നിലെ ആള്ക്കൂട്ടം കണ്ടില്ലെന്ന് നടിക്കാനാകില്ലെന്ന് വ്യക്തമാക്കിയ കോടതി ഒരാഴ്ചയ്ക്കകം വിശദീകരണം നല്കണമെന്ന് ആവശ്യപ്പെട്ടു.
മദ്യശാലകള്ക്ക് മുന്നിലെ തിരക്ക് കുറയ്ക്കുന്നതിനായി നടപടികള് സ്വീകരിക്കണമെന്നാവശ്യപ്പെട്ട് സമര്പ്പിച്ച ഹരജിയിലാണ് വിശദീകരണം തേടിയിരിക്കുന്നത്. അടുത്ത ചൊവ്വാഴ്ചയ്ക്കകം ഇതുസംബന്ധിച്ച് സംസ്ഥാന സര്ക്കാര് വിശദീകരണം നല്കണം. എക്സൈസ് കമ്മിഷണറോട് ഹാജരാകാനും കോടതി നിര്ദേശിച്ചിട്ടുണ്ട്.
നിലവില് കോവിഡ് പ്രോട്ടോക്കോളിന്റെ ലംഘനമാണ് നടക്കുന്നതെന്ന് ഹരജയില് ആരോപിച്ചിരുന്നു. കോവിഡ് പ്രോട്ടോക്കോള് മദ്യശാലകള്ക്ക് മുന്നില് പാലിക്കുന്നില്ലെന്ന കാര്യം കോടതി ശരിവെച്ചു. ഇതുമായി ബന്ധപ്പെട്ട ഫോട്ടോകളും വീഡിയോകളും കോടതി പരിഗണിച്ചിരുന്നു.
