ലഖ്നൗ- പെണ്കുട്ടികള്ക്കെതിരായ പീഡനങ്ങളില് മൊബൈല് ഫോണ് പ്രധാന പങ്കു വഹിക്കുന്നതായി ഉത്തര്പ്രദേശ് വനിതാകമ്മിഷന് അംഗം മീനാകുമാരി. അതിനാല് പെണ്കുട്ടികള്ക്ക് മൊബൈല് ഫോണ് നല്കരുതെന്നു അലിഗഡ് ജില്ലയില് സ്ത്രീകളുമായി ബന്ധപ്പെട്ട പരാതികള് കേള്ക്കുന്നതിനിടെ അവര് പറഞ്ഞു.
പെണ്കുട്ടികള്ക്ക് മൊബൈല് ഫോണുകള് നല്കാന് പാടില്ല. അവര് ഫോണിലൂടെ ആണ്കുട്ടികളുമായി മണിക്കൂറുകളോളം സംസാരിക്കുകയും പിന്നീട് അവര്ക്കൊപ്പം ഓടിപ്പോവുകയും ചെയ്യും. പെണ്കുട്ടികളുടെ ഫോണുകള് പരിശോധിക്കുന്നില്ല. കുടുംബാംഗങ്ങള് ഇത്തരം കാര്യങ്ങളെക്കുറിച്ച് അറിവില്ലാത്തവരാണ്- മീനാകുമാരി പറഞ്ഞു.
സ്ത്രീകള്ക്കെതിരായ അതിക്രമങ്ങള് വര്ധിച്ചുവരുന്നതിനെ സമൂഹം ഗൗരവത്തോടെ കാണേണ്ടതുണ്ടെന്നും അവര് പറഞ്ഞു. മാതാപിതാക്കള്ക്ക് പ്രത്യേകിച്ച് അമ്മമാര്ക്ക് വലിയ ഉത്തരവാദിത്തമാണ് ഉളളതെന്നും അവര് കൂട്ടിച്ചേര്ത്തു- അമ്മമാര്ക്ക് വലിയ ഉത്തരവാദിത്തമാണ് ഉളളത്. ഇന്ന് അവരുടെ മക്കള് ശ്രദ്ധയില്ലാത്തവരാണെങ്കില് അതിന്റെ ഉത്തരവാദികള് അമ്മമാരാണ്.
എന്നാല് കമ്മീഷന്റെ വൈസ് ചെയര്പേഴ്സണായ അഞ്ജു ചൗധരി മീനകുമാരിയുടെ അഭിപ്രായങ്ങളോട് യോജിച്ചില്ല. ലൈംഗികാതിക്രമങ്ങള് തടയുന്നതിനുളള പരിഹാരം മൊബൈല് ഫോണ് എടുത്തുമാറ്റുന്നതല്ലെന്ന് അവര് അഭിപ്രായപ്പെട്ടു.
