തിരുവനന്തപുരം- കോടതി ഉത്തരവ് പ്രകാരം വസ്തു ഒഴിപ്പിക്കാനെത്തിയവര്ക്ക് മുന്നില് പെട്രോളൊഴിച്ച് തീകൊളുത്തി ആത്മഹത്യയ്ക്ക് ശ്രമിച്ച ഗൃഹനാഥനും ഭാര്യയും മരിച്ച സംഭവത്തില് കുട്ടികള്ക്ക് വീടുവെച്ച് നല്കാന് മുഖ്യമന്ത്രി പിണറായി വിജയന് നിര്ദേശം നല്കി. എത്രയും വേഗം നടപടികള് സ്വീകരിക്കണമെന്ന് മുഖ്യമന്ത്രി ജില്ലാ ഭരണകൂടത്തോട് നിര്ദേശിച്ചു. കുട്ടികളുടെ വിദ്യാഭ്യാസ ചെലവ് സര്ക്കാര് ഏറ്റെടുക്കും.
അതിയന്നൂര് പഞ്ചായത്തിലെ പോങ്ങില് നെട്ടതോട്ടം ലക്ഷംവീട് കോളനിയില് രാജന്, ഭാര്യ അമ്പിളി എന്നിവരാണ് മരിച്ചത്. ഗുരുതരമായി പൊള്ളലേറ്റ് മെഡിക്കല് കോളേജ് ആശുപത്രിയില് ചികിത്സയില് കഴിയുകയായിരുന്നു ഇരുവരും. രാജന് ഞായറാഴ്ച രാത്രിയും അമ്പിളി തിങ്കളാഴ്ച രാത്രിയുമാണ് മരിച്ചത്. കഴിഞ്ഞ ചൊവ്വാഴ്ച ഉച്ചയ്ക്കാണ് ഇവര് ആത്മഹത്യക്ക് ശ്രമിച്ചത്.
അച്ഛനും അമ്മയും മരിച്ചതോടെ രാഹുലിന്റെയും രഞ്ജിത്തിന്റെ ജീവിതം വഴിമുട്ടിയനിലയിലാണ്. രാഹുല് പഠനശേഷം വര്ക്ക് ഷോപ്പില് ജോലിക്ക് പോകുകയാണ്. രഞ്ജിത്ത് പ്ലസ്ടു പൂര്ത്തിയാക്കിയിട്ടുണ്ട്.
