ഷാർജ- മാധ്യമ പ്രവർത്തകന്‍ കെ.ടി. അബ്ദുറബ്ബ് എഡിറ്ററായ സലാം ഫുട്ബോൾ പുസ്തകത്തിന്‍റെ യു.എ. ഇയിലെ പ്രകാശനം ഷാർജ അന്താരാഷ്ട്ര പുസ്തകമേളയിൽ നടന്നു. കെഎംസിസി യുഎഇ ചെയർമാൻ ശം സുദ്ദീൻ ബിൻ മുഹ്‌യുദ്ധീനാണ് പ്രകാശന കർമം നിർവഹിച്ചത്. ഇന്ത്യന്‍ കോച്ചിംഗ് ക്യാമ്പ് വരെ എത്തിയ മധുരകോട്‌സിന്റെ പ്രശസ്ത ഫുട്‌ബോള്‍ താരമായിരുന്ന പുതിയോട്ടില്‍ അബ്ദുല്‍ സലാമിനെ സ്മരിച്ച് നാട്ടുകാരും പ്രശസ്തരും എഴുതിയ ഓര്‍മ കുറിപ്പുകളാണ് പുസ്തകത്തില്‍. ജൂലൈ 21 നായിരുന്നു അദ്ദേഹം അന്തരിച്ചത്.
ഇന്ത്യൻ അസോസിയേഷൻ ബൂത്തിൽ നടന്ന ചടങ്ങിൽ കെഎംസിസി യുഎഇ പ്രസിഡണ്ട് ഡോ: പുത്തൂർ റഹ്മാൻ , ജനറൽ സെക്രട്ടറി അൻവർ നഹ, ഇന്ത്യൻ അസോസിയേഷൻ പ്രസിഡന്റ് ഇ.പി. ജോൺസൺ, വൈസ് പ്രസിഡന്റ് വൈ.എ റഹിം, അജ്മൽ ഹാദി, മുഷ്‌താഖ്, കബീർ പാലിയിൽ എന്നിവർ പങ്കെടുത്തു.
ബഷീർ തിക്കോടി പുസ്തകം പരിചയപ്പെടുത്തി. കോവിഡ് നിയന്ത്രണങ്ങൾ കാരണം പ്രശസ്ത ഫുട്ബോൾ താരം ഐ.എം വിജയനു എത്താൻ കഴിയാത്തതിനെ തുടർന്ന് അന്താരാഷ്ട്ര ഫുട്ബോൾ മേളകളിൽ സജീവമായ ശരീഫ് ചിറക്കൽ വിജയനു വേണ്ടി പുസ്തകം ഏറ്റുവാങ്ങി. പുസ്തകത്തിന് എല്ലാവിധ ആശംസകളും നേർന്നവിജയൻ ഇതിനു പിന്നിൽ പ്രവർത്തിച്ചവരെ അനുമോദിച്ചു.
ദേശീയ തലത്തിൽ ശ്രദ്ധേയരായ ഐ എം വിജയൻ, ഷറഫലി, പ്രേംനാഥ് ഫിലിപ്, റിക്കി ബ്രൗൺ, സക്കീർ, അഷ്‌റഫ്, സെൻഗുപ്‌ത, സയ്ദ് ഫസൽ, രാഘവൻ ഹബീബ് റഹ്മാൻ, ബഷീർ, രാജമാണിക്യം, സൂപ്പർ അഷ്‌റഫ്, തുടങ്ങി ഒട്ടേറെ കാല്പന്തുകളിക്കാരും പ്രമുഖ കളി എഴുത്തുകാരായ അബു, കമൽ വരദൂർ, ഇ.കെ അബ്ദുൽ സലിം, എം എം ജാഫർഖാൻ എന്നിവരും പുസ്തകത്തിൽ എഴുതുന്നുണ്ട്.
ഒ. അബ്ദുറഹ്മാൻ, സി ടി അബ്ദുറഹീം, ഹമീദ് ചേന്നമംഗലൂർ, ഒ അബ്ദുല്ല, മാലിക് നാലകത്ത്, പി.ടി. കുഞ്ഞാലി തുടങ്ങി സാംസ്‌കാരിക സാമൂഹിക രംഗത്തുള്ളവരും ഫുട്ബോളിനെക്കുറിച്ചും സലാമിനെക്കുറിച്ചും പറയുന്നുണ്ട്. പെൻഡുലം ബുക്ക്സ് ആണ് 196 പേജുകൾ ഉള്ള പുസ്തകം പുറത്തിറക്കിയിരിക്കുന്നത്. പുസ്തകമേളയില്‍ യുവത, ഐ.പി.എച്ച് സ്റ്റാളുകളില്‍ പുസ്തകം ലഭ്യമാണ്.
