കൊച്ചി-സുരേഷ് ഗോപിയുടെ 250ആം ചിത്രം എന്ന നിലയില് പ്രഖ്യാപിക്കപ്പെട്ട ഒന്നായിരുന്നു കടുവകുന്നേല് കുറുവച്ചന് എന്ന ചിത്രം. മുളകുപാടം ഫിലിംസിന്റെ ബാനറില് ടോമിച്ചന് മുളകുപാടം നിര്മ്മിക്കുന്ന ചിത്രത്തിന് ഇപ്പോള് കോടതിയുടെ വിലക്ക് ലഭിച്ചിരിക്കുകയാണ്. പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്യുവാനിരിക്കുന്ന കടുവ എന്ന ചിത്രത്തിന്റെ അണിയറ പ്രവര്ത്തകരാണ് സുരേഷ് ഗോപിയുടെ ചിത്രത്തിനെതിരെ കോടതിയില് പരാതി നല്കിയത്.
എസ്.ജി 250 എന്ന പേരില് സുരേഷ് ഗോപി കടുവാക്കുന്നേല് കുറുവച്ചന് എന്ന നായകനായി ഈ വര്ഷം മേയിലാണ് ടോമിച്ചന് മുളകുപ്പാടം സിനിമ പ്രഖ്യാപിച്ചത്. പൃഥ്വിരാജ് ഒഴികെ മോഹന്ലാലും മമ്മൂട്ടിയും അടക്കം 100 താരങ്ങളാണ് മാത്യൂസ് തോമസ് സംവിധാനം ചെയ്യുന്ന സിനിമയുടെ ടൈറ്റില് പ്രഖ്യാപിച്ചത്.പൃഥ്വിരാജിനെ ഒഴിവാക്കിയ പേരില് നിരവധി പേര് പരസ്പരം ഫാന് ഫൈറ്റുകള് നടത്തുന്നുണ്ട്. ഇതില് ഇപ്പോള് ഒരു വിശദീകരണം നല്കുകയാണ് സുരേഷ് ഗോപി.
സുരേഷ് ഗോപിയുടെ കുറിപ്പ്:
മലയാളികളുടെ പ്രിയ നടന് തന്നെ ആണ് പ്രിഥ്വി. ഇപ്പോള് നമ്മള് ചെയ്യേണ്ടത് സിനിമ എന്ന മാധ്യമം കൊണ്ട് ഉപജീവനം നടത്തുന്ന ഞാന് ഉള്പ്പെടെ ഉള്ള ആളുകളുടെ നിലനില്പിന് കോട്ടം വരാത്ത രീതിയില് മുന്നോട്ട് പോവുക എന്നതാണ്. രണ്ട് സിനിമയും നടക്കട്ടെ. രണ്ടിനും വേറിട്ട തിരക്കഥ ആണ് ഉള്ളത്. രണ്ടും മികച്ച സിനിമ സൃഷ്ടി ആകും എന്ന ശുഭ പ്രതീക്ഷയോടെ. എന്റെ സിനിമയും പ്രിഥ്വിയുടെ സിനിമയും സ്വീകരിക്കും എന്നു വിശ്വസിച്ച് കൊണ്ട് ഒരു മത്സര ബുദ്ധിയോടെ കാണരുത് ആകരുത് എന്ന് അപേക്ഷിക്കുന്നു.