കൊച്ചി-ആറു വര്‍ഷങ്ങള്‍ക്ക് ശേഷം തന്റെ പ്രിയ കഥാപാത്രങ്ങളായ ജോര്‍ജുകുട്ടിക്കും കുടുംബത്തിനുമൊപ്പമുള്ള ചിത്രം പങ്കു വെച്ച് സംവിധായകന്‍ ജീത്തു ജോസഫ്. ചിത്രീകരണം പുരോഗമിക്കുന്ന മോഹന്‍ലാല്‍ ചിത്രം ദൃശ്യം 2ന്റെ ലൊക്കേഷനില്‍ നിന്നുള്ള ചിത്രമാണ് സിനിമ പ്രേമികള്‍ക്കായി ജീത്തു പങ്കു വെച്ചത്.ചിത്രത്തിലെ പ്രധാനകഥാപാത്രങ്ങളെ അവതരിപ്പിക്കുന്ന മോഹല്‍ലാല്‍, മീന, എസ്‌തേര്‍ അനില്‍, അന്‍സിബ എന്നിവരാണ് ജീത്തു ജോസഫിനൊപ്പമുള്ള ചിത്രത്തില്‍ ഉള്ളത്.ആറു വര്‍ഷങ്ങള്‍ക്കു മുന്‍പ് പുറത്തിറങ്ങിയ ദൃശ്യം എന്ന ചിത്രത്തിന്റെ രണ്ടാം ഭാഗമായ ദൃശ്യം 2, കഴിഞ്ഞ ആഴ്ചയാണ് ഷൂട്ടിംഗ് ആരംഭിച്ചത്. 2013 ല്‍ ജിത്തു ജോസഫ് സംവിധാനം ചെയ്ത് ബ്ലോക്ക് ബസ്റ്റര്‍ ആയി മാറിയ ചിത്രമായിരുന്നു ദൃശ്യം. മലയാള സിനിമയില്‍ അതുവരെ ഉണ്ടായിരുന്ന ബോക്‌സ് ഓഫീസ് റെക്കോര്‍ഡുകള്‍ പഴങ്കഥയാക്കിയ വിജയമായിരുന്നു ചിത്രത്തിന്റെത്. ചിത്രം പോലെ തന്നെ നായകനായ മോഹന്‍ലാല്‍ അവതരിപ്പിച്ച ജോര്‍ജ്കുട്ടി എന്ന കഥാപാത്രവും ചര്‍ച്ചയായിരുന്നു.ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മ്മിക്കുന്നത്. തൊടുപുഴയിലും എറണാകുളത്തും പരിസരപ്രദേശങ്ങളിലുമായി ചിത്രത്തിന്റെ ഷൂട്ടിംഗ് പുരോഗമിച്ചു വരികയാണ്.
