ദുബായ്- ഇന്ത്യയില്നിന്നു ദുബായിലേക്കും തിരിച്ചുമുള്ള യാത്രകള്ക്ക് കൂടുതല് ഇളവു വരുത്തി പുതിയ മാനദണ്ഡങ്ങള് പ്രഖ്യാപിച്ചു. ദുബായിലേക്ക് വരുന്നവര്ക്ക് കോവിഡ്–19 പി.സി.ആര് പരിശോധന നിര്ബന്ധമാണെന്ന നിബന്ധന തുടരും.
യു.എ.ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിന് റാഷിദ് അല് മക്തൂമിന്റെ നിര്ദേശപ്രകാരം ദുബായ് ദുരന്തനിവാരണ സുപ്രീം കമ്മിറ്റിയാണ് സുരക്ഷാ മുന്കരുതലുകളില് വിട്ടുവീഴ്ചയില്ലാതെ യാത്രക്കാര്ക്ക് ആശ്വാസമാകുന്ന പുതിയ നിബന്ധനകള് പ്രഖ്യാപിച്ചത്.
-വിദേശത്തുള്ള യു.എ.ഇ സ്വദേശികള്ക്ക് ആ രാജ്യം ആവശ്യപ്പെടുന്നില്ലെങ്കില് ദുബായിലേക്ക് തിരിച്ചുവരാന് പി.സി.ആര് പരിശോധന ആവശ്യമില്ല. എന്നാല്, ദുബായിലെത്തിയാല് പി.സി.ആര് പരിശോധന നിര്ബന്ധമാണ്.
-മറ്റ് രാജ്യങ്ങളില് നിന്നു ദുബായിലേക്ക് വരുന്ന ട്രാന്സിറ്റ് യാത്രക്കാര് പുറപ്പെടുന്നതിന് മുന്പ് പി.സി.ആര് പരിശോധന നടത്തണം. ട്രാന്സിറ്റ് യാത്രക്കാര് വരുന്ന രാജ്യം നിഷ്കര്ഷിക്കുകയാണെങ്കില് പുറപ്പെടുന്നതിന് മുന്പും പി.സി.ആര് പരിശോധന നടത്തേണ്ടതാണ്.
-സ്വദേശികള്, താമസ വിസക്കാര്, വിനോദ സഞ്ചാരികള് എന്നിവര് ദുബായില്നിന്ന് പുറപ്പെടുമ്പോള്, അവര് പോകുന്ന രാജ്യം ആവശ്യപ്പെട്ടാല് മാത്രം കോവിഡ്–19 സര്ട്ടിഫിക്കറ്റ് കൈയില് കരുതുക.
ദുബായിലേക്ക് വരികയും ഇവിടെനിന്ന് പോവുകയും ചെയ്യുന്ന സ്വദേശികള്, താമസ വിസക്കാര്, ടൂറിസ്റ്റ്, ട്രാന്സിറ്റ് യാത്രക്കാര് എന്നിവര്ക്ക് ഗുണകരമാകുന്നതാണ് പുതിയ തീരുമാനങ്ങള്.
