ന്യൂദൽഹി- ആഗോളതലത്തില് താല്ക്കാലികമായി നിർത്തിവെച്ച കോവിഡ് വാക്സിൻ പരീക്ഷണം നിർത്താത്തതുമായി ബന്ധപ്പെട്ട് പൂനെയിലെ സെറം ഇൻസ്റ്റിറ്റ്യൂട്ടിന് ഡ്രഗ്സ് കൺട്രോളർ ജനറലിന്റെ നോട്ടീസ്.
വാക്സിൻ കുത്തിവച്ച ഒരാളിൽ അജ്ഞാതരോഗം കണ്ടെത്തിയതിനെത്തുടർന്ന് ഓക്സ്ഫഡ് സർവകലാശാല വികസിപ്പിച്ച വാക്സിന്റെ മനുഷ്യരിലുള്ള പരീക്ഷണം മരുന്ന് കമ്പനി നിർത്തിവച്ചിരുന്നു.
ഈ സാഹചര്യത്തിൽ സുരക്ഷ ഉറപ്പുവരുത്തുന്നതുവരെ വാക്സിന്റെ രണ്ടും മൂന്നും ഘട്ട പരീക്ഷണങ്ങൾ നിർത്തിവെക്കാത്തത് എന്തുകൊണ്ടാണെന്ന് നോട്ടീസിൽ ഡ്രഗ്സ് കണ്ട്രോളർ ആരാഞ്ഞു.
വ്യക്തമായ കാരണം വിശദമാക്കണമെന്നാണ് നോട്ടീസിലെ ആവശ്യം. ഓക്സ്ഫഡ് സർവകലാശാലയുടെ കോവിഡ് വാക്സിന്റെ ഇന്ത്യയിലെ പരീക്ഷണം തുടരുമെന്ന് സെറം ഇൻസ്റ്റിറ്റ്യൂട്ട് നേരത്തെ വ്യക്തമാക്കിയിരുന്നു.
ഇന്ത്യയിലെ പരീക്ഷണങ്ങൾക്കിടെ പ്രശ്നങ്ങളൊന്നും കാണാത്തതിനാൽ മുന്നോട്ടുപോകുമെന്നാണ് വ്യക്തമാക്കിയിരുന്നത്.
