തിരുവനന്തപുരം- തിരുവനന്തപുരം വിമാനത്താവളം അദാനിക്ക് കൈമാറണമെന്നും തീരുമാനം നടപ്പാക്കണമെന്നും ആവശ്യപ്പെട്ട് ജനകീയ കൂട്ടായ്മ. കോര്‍പ്പറേഷന്‍ തെരഞ്ഞെടുപ്പ് കൂടി ലക്ഷ്യം വെച്ചാണ് ഇതു സംബന്ധിച്ച പ്രചാരണം.
റസിഡന്‍സ് അസോസിയേഷനുകളുടെ സംഘടനയായ ഫ്രാറ്റ്, തിരുവനന്തപുരം ചേംബര്‍ ഓഫ് കൊമേഴ്‌സ്, ടെക്‌നോപാര്‍ക്കിലെ ഐടി കമ്പനികളുടെ സംഘടനയായ ജി ടെക്, ട്രിവാന്‍ഡ്രം മാനേജ്‌മെന്റ് അസോസിയേഷന്‍ എന്നീ കൂട്ടായമ്കളും പ്രൊഫഷണലുകളായ യുവാക്കളുമാണ് രംഗത്തുവന്നിരിക്കുന്നത്. വേണ്ടി വന്നാല്‍ കിഴക്കമ്പലം ട്വന്റിട്വന്റി മാതൃകയില്‍ മൂന്നുമുന്നണികള്‍ക്കുമെതിരെ തെരഞ്ഞെടുപ്പില്‍ മത്സരിച്ചേക്കുമെന്നും ഇവര്‍ സൂചന നല്‍കുന്നു.
തലസ്ഥാനനഗരത്തിന്റെ വികസനമെന്ന അജണ്ടയിലൂന്നിയാണ് കൂട്ടായ്മ തുടക്കം. നഗരവാസികള്‍ക്കിടയില്‍ സ്വാധീനമുള്ള നിരവധി സംഘടനകള്‍ ഇതിന്റെ ഭാഗമാണ്. വര്‍ഷങ്ങളായി മുടങ്ങിക്കിടക്കുന്ന തിരുവനന്തപുരം വിമാനത്താവളത്തിന്റെ വികസനം യാഥാര്‍ഥ്യത്തിലേക്ക് അടുക്കുമ്പോള്‍ തലസ്ഥാന നഗരത്തോട് പ്രതിബദ്ധതയില്ലാത്ത രാഷ്ട്രീയ പാര്‍ട്ടികള്‍ അതിന് തുരങ്കം വെക്കുകയാണെന്നാണ് ആരോപണം.
തദ്ദേശതെരഞ്ഞെടുപ്പില്‍ വിമാനത്താവള വികസനം മുഖ്യ ചര്‍ച്ചാ വിഷയമാക്കും. വികസനത്തിന് എതിരുനില്‍ക്കുന്നവരെ തോല്‍പ്പിക്കുമെന്നും വേണ്ടിവന്നാല്‍ സ്വന്തം സ്ഥാനാര്‍ത്ഥികളെ നിര്‍ത്തുമെന്നും കൂട്ടായ്മയില്‍ അണിനിരന്നവര്‍ പറയുന്നു.
