ദുബായ്- യു.എ.ഇയില്‍ 399 പേര്‍ക്ക് കൂടി കോവിഡ് 19 സ്ഥിരീകരിച്ചു. 316 പേര്‍ രോഗമുക്തി നേടിയതായും ഒരാള്‍ മരിച്ചതായും ആരോഗ്യ-രോഗപ്രതിരോധ മന്ത്രാലയം അറിയിച്ചു. 24 മണിക്കൂറിനിടെ 69,000ത്തിലേറെ പേര്‍ക്ക് കൂടി കോവിഡ് പരിശോധന നടത്തി. രാജ്യത്തെ ആകെ രോഗികളുടെ എണ്ണം 68,020 ആണ്. ഇതില്‍ 59,070 പേരും രോഗമുക്തി നേടി. ആകെ മരണം 378. നിലവില്‍ 8,572 പേര്‍ ചികിത്സയില്‍ കഴിയുന്നതായും മന്ത്രാലയം വ്യക്തമാക്കി.
കോവിഡ് കേസുകള്‍ തുടര്‍ച്ചയായ ദിവസങ്ങളില്‍ വര്‍ധിച്ചു നില്‍ക്കുന്ന സാഹചര്യത്തില്‍ രാജ്യം രണ്ടാം ഘട്ട വ്യാപന ഭീതിയിലാണ്. സാമൂഹിക അകലമടക്കം സുരക്ഷാ നിയമങ്ങള്‍ കര്‍ശനമായി പാലിക്കണമെന്നു അധികൃതര്‍ മുന്നറിയിപ്പ് നല്‍കി. നിയമലംഘകര്‍ക്കെതിരെ പിഴയടക്കം ശക്തമായ നടപടികള്‍ സ്വീകരിക്കുമെന്നും വ്യക്തമാക്കി. ദേശീയ അണുനശീകരണ യജ്ഞം പുനരാരംഭിക്കാനും ആരോഗ്യമന്ത്രാലയം ആലോചിക്കുന്നുണ്ട്.
ഓഗസ്റ്റ് ആദ്യം മുതല്‍ ഇതുവരെ കോവിഡ് കേസുകളില്‍ പത്തു ശതമാനം വര്‍ധനയാണ് റിപ്പോര്‍ട്ട് ചെയ്തിക്കുന്നത്. കഴിഞ്ഞ രണ്ടാഴ്ചയില്‍ ഇത് ഒമ്പതര മുതല്‍ 12 ശതമാനം വരെയാണ് എന്ന് ആരോഗ്യമന്ത്രാലയം വക്താവ് ഡോ. ഉമര്‍ ബിന്‍ ഹമ്മാദി പറഞ്ഞു. 0.5 ശതമാനമാണ് മരണത്തിന് കീഴടങ്ങിയവര്‍. മരണനിരക്ക് കുറഞ്ഞത് ചികിത്സാ മേഖലയിലെ രാജ്യത്തിന്റെ നേട്ടമാണെന്ന് ഹമ്മാദി കൂട്ടിച്ചേര്‍ത്തു.
