ന്യൂദൽഹി - മഹാരാഷ്ട്രയിൽ കോവിഡ് വ്യാപനം രൂക്ഷമായി തുടരുന്നതിനിടെ രാജ്യത്ത് കോവിഡ് ബാധിതരുടെ എണ്ണം 27 ലക്ഷം കടന്നു. വിവിധ സംസ്ഥാനങ്ങളിലായി ഇതുവരെ 27,02,743 പേർക്കാണ് വൈറസ് ബാധ കണ്ടെത്തിയത്. 51,797 പേർ ഇതിനകം കോവിഡ് ബാധിച്ച് മരിച്ചതായും കേന്ദ്ര ആരോഗ്യ മന്ത്രാലയത്തിന്റെ കണക്കുകൾ വ്യക്തമാക്കുന്നു.
24 മണിക്കൂറിനിടെ 55,079 പേർക്കാണ് കോവിഡ് സ്ഥിരീകരിച്ചത്. 876 മരണവും റിപ്പോർട്ട് ചെയ്തു. നിലവിൽ 6,73,166 പേരാണ് വിവിധ ആശുപത്രികളിൽ ചികിത്സയിൽ കഴിയുന്നത്. 19,77,780 പേർ രോഗമുക്തി നേടി ആശുപത്രി വിട്ടതായും കേന്ദ്ര സർക്കാർ കണക്കുകൾ വ്യക്തമാക്കുന്നു.
മഹാരാഷ്ട്രയിൽ തിങ്കളാഴ്ച 8,493 പേർക്കുകൂടി കോവിഡ് സ്ഥിരീകരിച്ചു. ഇതോടെ ആകെ കോവിഡ് രോഗികളുടെ എണ്ണം 6,04,358 ആയി വർധിച്ചു. പുതുതായി 228 മരണം റിപ്പോർട്ട് ചെയ്തതോടെ കോവിഡ് മരണം 20,265 ആയതായും മഹാരാഷ്ട്ര ആരോഗ്യവകുപ്പ് അറിയിച്ചു.
4,28,123 പേർ ഇതുവരെ സംസ്ഥാനത്ത് രോഗമുക്തരായി. തിങ്കളാാഴ്ച മാത്രം 11,391 പേർ രോഗമുക്തി നേടി. 1,55,268 ആക്ടീവ് കേസുകളാണുള്ളത്.
