തൃശൂർ - ജില്ലയിൽ ഇന്നലെ 26 പേർക്ക് കൂടി കോവിഡ് സ്ഥിരീകരിച്ചു. അഞ്ചു പേർ രോഗമുക്തരായി. രോഗം സ്ഥിരീകരിച്ചവരിൽ 15 പേർ വിദേശത്തു നിന്നും ഒമ്പതു പേർ മറ്റു സംസ്ഥാനങ്ങളിൽ നിന്നും വന്നവരാണ്. സമ്പർക്കത്തിലൂടെ രണ്ടു പേർക്ക് രോഗം സ്ഥിരീകരിച്ചു.
ജൂൺ 26ന് ദുബായിൽ നിന്ന് വന്ന ചാവക്കാട് സ്വദേശി (40), ജൂൺ 27ന് മസ്‌ക്കത്തിൽ നിന്ന് വന്ന മുറ്റിച്ചൂർ സ്വദേശികൾ (34, സ്ത്രീ, 12 വയസ്സുള്ള ആൺകുട്ടി), ജൂൺ 26ന് ദോഹയിൽ നിന്ന് വന്ന കൊടുങ്ങല്ലൂർ സ്വദേശി (24), ജൂൺ 26ന് ദോഹയിൽ നിന്ന് വന്ന കാഞ്ഞൂർ സ്വദേശി (52, പുരുഷൻ), ജൂൺ 26ന് ദോഹയിൽ നിന്ന് വന്ന ഏനാമാക്കൽ സ്വദേശി (46), ജൂൺ 26 ന് സൗദിയിൽ നിന്ന് വന്ന അടാട്ട് സ്വദേശി (59), ജൂൺ 16 ന് റഷ്യയിൽ നിന്ന് വന്ന അരിമ്പൂർ സ്വദേശി (20), ജൂൺ 20ന് മസ്‌ക്കത്തിൽ നിന്ന് വന്ന പീച്ചി സ്വദേശി (52), ജൂൺ 11ന് റിയാദിൽ നിന്ന് വന്ന പീച്ചി സ്വദേശി (30), ജൂൺ 13ന് കുവൈത്തിൽ നിന്ന് വന്ന പുത്തൻചിറ സ്വദേശി (58), ജൂൺ 14ന് കുവൈത്തിൽ നിന്ന് വന്ന നടവരമ്പ് സ്വദേശി (34), ജൂൺ 14ന് കുവൈത്തിൽ നിന്ന് വന്ന അളഗപ്പനഗർ സ്വദേശി (46), ജൂൺ 15ന് മലേഷ്യയിൽ നിന്ന് വന്ന പരിയാരം സ്വദേശി (38), ജൂൺ 26ന് ഖത്തറിൽ നിന്ന് വന്ന മുള്ളൂർക്കര സ്വദേശി (38), ജൂൺ 24ന് ദൽഹിയിൽ നിന്ന് വന്ന ഒല്ലൂക്കര സ്വദേശി (30), ജൂൺ 17 ന് ചെന്നൈയിൽ നിന്ന് വന്ന കടങ്ങോട് സ്വദേശികൾ (15 വയസ്സുള്ള പെൺകുട്ടി, 40 വയസ്സായ സ്ത്രീ), ബംഗളൂരുവിൽ നിന്ന് വന്ന രണ്ട് തെക്കുംകര സ്വദേശികൾ (47, 44), മുംംബെയിൽ നിന്ന് വന്ന ചൂലിശ്ശേരി സ്വദേശികളായ ഒരു കുടുംബത്തിൽപെട്ടവർ (58, പുരുഷൻ, 48, സ്ത്രീ), ജൂൺ 24ന് ചെന്നൈയിൽ നിന്ന് വന്ന മുരിങ്ങൂർ സ്വദേശി (30), ജൂൺ 22 ന് ബംഗളൂരുവിൽ നിന്ന് വന്ന ഏറിയാട് സ്വദേശി (47) എന്നിവർക്ക് രോഗം സ്ഥിരീകരിച്ചു.
തൃശൂർ കോർപ്പറേഷൻ ഓഫീസിലെ രോഗം സ്ഥിരീകരിച്ച വ്യക്തിയുമായി സമ്പർക്കത്തിലുണ്ടായിരുന്ന കോർപ്പറേഷൻ ആരോഗ്യ വിഭാഗം ഉദ്യോഗസ്ഥരായ വടക്കാഞ്ചേരി സ്വദേശിക്കും (47), ചേർപ്പ് സ്വദേശിക്കും (38) രോഗം സ്ഥിരീകരിച്ചു.
ജില്ലയിൽ കോവിഡ് 19 സ്ഥിരീകരിച്ച 174 പേരാണ് ആശുപത്രികളിൽ ചികിത്സയിൽ കഴിയുന്നത്. തൃശൂർ സ്വദേശികളായ ഏഴു പേർ മറ്റു ജില്ലകളിൽ രോഗം സ്ഥിരീകരിച്ച് ആശുപത്രികളിൽ കഴിയുന്നുണ്ട്. ഇതുവരെ 215 പേർ ജില്ലയിൽ രോഗമുക്തരായി.
കോവിഡ് പ്രതിരോധത്തിന്റെ ഭാഗമായി ജില്ലയിൽ വീടുകളിൽ 19151 പേരും ആശുപത്രികളിൽ 186 പേരും ഉൾപ്പെടെ ആകെ 19337 പേരാണ് നിരീക്ഷണത്തിലുള്ളത്. ഇന്നലെ നിരീക്ഷണത്തിന്റെ ഭാഗമായി 23 പേരെ ആശുപത്രിയിൽ പ്രവേശിപ്പിച്ചു.
ജില്ലയിൽ രണ്ട് കണ്ടെയ്ൻമെന്റ് സോണുകൾ കൂടി പ്രഖ്യാപിച്ചു. ചാലക്കുടി നഗരസഭയുടെ 16, 19, 21, 30, 31, 35, 36 ഡിവിഷനുകൾ, ശ്രീനാരായണപുരം ഗ്രാമപഞ്ചായത്തിന്റെ 7, 8 വാർഡുകൾ എന്നിവയാണ് പുതുതായി പ്രഖ്യാപിച്ച കണ്ടെയ്ൻമെന്റ് സോണുകൾ.
ഇതോടൊപ്പം നേരത്തെ പ്രഖ്യാപിച്ച അഞ്ച് തദ്ദേശസ്ഥാപന പ്രദേശങ്ങൾ കണ്ടെയ്ൻമെന്റ് സോണുകളായി തുടരും. തൃശൂർ കോർപ്പറേഷനിലെ 3, 32, 35, 36, 39, 48, 49 ഡിവിഷനുകൾ, കുന്നംകുളം നഗരസഭയിലെ 7, 8, 11, 15, 19, 20 ഡിവിഷനുകൾ, കാട്ടകാമ്പാൽ പഞ്ചായത്തിലെ 6, 7, 9 വാർഡുകൾ, കടവല്ലൂർ പഞ്ചായത്തിലെ 14, 15, 16 വാർഡുകൾ, വെള്ളാങ്കല്ലൂർ പഞ്ചായത്തിലെ 14, 15 വാർഡുകൾ എന്നിവയാണവ.
ഇവിടങ്ങളിൽ അവശ്യസർവ്വീസുകൾ മാത്രമേ അനുവദിക്കൂ. കോടതി, ദുരന്തനിവാരണ ജോലിയിൽ ഏർപ്പെട്ടിട്ടുള്ള സർക്കാർ, അർധ സർക്കാർ സ്ഥാപനങ്ങൾ എന്നിവയൊഴികെ മറ്റ് സ്ഥാപനങ്ങൾ പ്രവർത്തിക്കരുത്. ബാങ്കിംഗ് സ്ഥാപനങ്ങൾ ഉച്ചക്ക് രണ്ടു വരെ പകുതി ജീവനക്കാരെ ഉപയോഗിച്ച് പ്രവർത്തിക്കണം.
