മലപ്പുറം- ഓൺ ലൈൻ പഠനത്തിന് സമാർട്ട് ഫോൺ ഇല്ലാത്തതിനെ തുടർന്ന് ആകെയുള്ള ചെറിയ കമ്മൽ വിൽക്കാനൊരുങ്ങിയ വിദ്യാർത്ഥിനിക്ക് മുനവ്വറലി തങ്ങൾ ഇടപെട്ട് സ്മാർട്ട് ഫോൺ നൽകി. ലോക്ഡൗണിൽ കൂലിപണിക്കാരനായ പിതാവിന് ജോലി ഇല്ലാതായതിനെ തുടർന്ന് ഓൺലൈൻ ക്ലാസ്സിൽ പങ്കെടുക്കാനാവാതെ ബുദ്ധിമുട്ടുകയായിരുന്നു. ആഭരണം വിൽക്കാനായി മലപ്പുറത്തെത്തിയ കുട്ടിയെ ശ്രദ്ധയിൽ പെട്ട യൂത്ത് ലീഗ് മണ്ഡലം വൈസ്.പ്രസിഡന്റ് ഹക്കീം കോൽമണ്ണ പാണക്കാട് മുനവ്വറലി തങ്ങളെ വിവരമറിയിക്കുകയായിരുന്നു. ഉടൻ തന്നെ തങ്ങൾ ദുബൈ കെ.എം.സി.സി കണ്ണമംഗലം പഞ്ചായത്ത് ട്രഷറർ ഇൽയാസ് പി.സി.യുമായി ബന്ധപ്പെട്ട് ഫോൺ തരപ്പെടുത്തി നൽകുകയായിരുന്നു. ചടങ്ങിൽ പി.കെ. ഫിറോസ്, നജീബ് കാന്തപുരം, ഫൈസൽ ബാഫഖി തങ്ങൾ, മുജീബ് കാടേരി, അനീസ് കെ.പി. ചേറൂർ, സഫ് വാൻ, ഇ.പി എന്നിവർ പങ്കെടുത്തു.
