തിരുവനന്തപുരം- നാട്ടിലേക്ക് മടങ്ങുന്ന പ്രവാസികള്‍ ക്വാറന്റൈന്‍ ചെലവ് സ്വന്തമായി വഹിക്കണമെന്ന സര്‍ക്കാര്‍ നിലപാട് മനുഷ്യത്വരഹിതമായ നടപടിയാണെന്നു മുന്‍ മുഖ്യമന്ത്രി ഉമ്മന്‍ ചാണ്ടി. ഇത് പ്രവാസികളോടുള്ള അവഹേളനവും കേരളീയര്‍ക്ക് അപമാനവുമാണെന്ന് അദ്ദേഹം കുറ്റപ്പെടുത്തി.
നമ്മുടെ നാടിന്റെ സമ്പദ്ഘടനയുടെയും സമൃദ്ധിയുടെയും അടിത്തറ പ്രവാസികള്‍ കെട്ടിയുണ്ടാക്കിയതാണ്. സാമ്പത്തികമായി തകര്‍ന്ന അവര്‍ ജോലിയും കൂലിയും നഷ്ടപ്പെട്ട് സ്വന്തമായി ടിക്കറ്റെടുത്താണ് തിരിച്ചുവരുന്നത്.
നിസഹായരും നിരാശരുമായി എത്തുന്ന അവര്‍ക്ക് എല്ലാവിധ പിന്തുണയും നല്‍കാന്‍ സര്‍ക്കാരിനും സമൂഹത്തിനും ഉത്തരവാദിത്തമുണ്ട്. ക്വാറന്റൈന്‍ ചെലവു കൂടി താങ്ങാനുള്ള സാമ്പത്തികശേഷി അവരില്‍ മിക്കവര്‍ക്കുമില്ലെന്നും ഉമ്മന്‍ ചാണ്ടി പറഞ്ഞു.
പ്രവാസികളോട് കാട്ടുന്ന ക്രൂരമായ സമീപനത്തില്‍ സര്‍ക്കാര്‍ മാറ്റം വരുത്തണമെന്നും അവരില്‍നിന്ന് ക്വാറന്റൈന്‍ തുക ഈടാക്കാനുള്ള തീരുമാനം അടിയന്തരമായി പുനഃപരിശോധിക്കണമെന്നും അദ്ദേഹം ആവശ്യപ്പെട്ടു.
