ദോഹ- ഖത്തറില്‍ സര്‍ക്കാര്‍ മേഖലയില്‍ ഈദുല്‍ ഫിതര്‍ അവധി തുടങ്ങി. സര്‍ക്കാര്‍, പൊതു മേഖലയില്‍ 28 വരെ 10 ദിവസമാണ് ഈദ് അവധിയെങ്കിലും ഫലത്തില്‍ 12 ദിവസത്തെ അവധി ലഭിക്കും. 29, 30 തീയതികള്‍ വെള്ളി, ശനി ദിവസങ്ങള്‍ ആയതിനാല്‍ രണ്ട് ദിവസത്തെ വാരാന്ത്യ അവധിക്ക് ശേഷം മേയ് 31 മുതല്‍ക്കേ സര്‍ക്കാര്‍, പൊതു മേഖലകള്‍ പ്രവര്‍ത്തനം തുടങ്ങുകയുള്ളു.
സ്വകാര്യ മേഖലയില്‍ മുഴുവന്‍ ശമ്പളത്തോടു കൂടി മൂന്നു ദിവസത്തെ അവധി നല്‍കിയിരിക്കണമെന്ന് തൊഴില്‍ മന്ത്രാലയം അറിയിച്ചിട്ടുണ്ട്. ഈദ് അവധി ദിവസങ്ങളില്‍ ഏതെങ്കിലും കാരണത്താല്‍ സ്വകാര്യ മേഖലയിലെ ജീവനക്കാരനു ജോലി ചെയ്യേണ്ടി വന്നാല്‍ തൊഴില്‍ നിയമത്തിലെ 74ാം വകുപ്പിലെ അധിക ജോലി സമയം, കൃത്യമായ അലവന്‍സ് എന്നിവ സംബന്ധിച്ച വ്യവസ്ഥകള്‍ കമ്പനി പാലിച്ചിരിക്കണം.
