മെഗാ സ്റ്റാർ മമ്മൂട്ടിയെ നായകനാക്കി ഒരു മാസ് ചിത്രത്തിനുള്ള ആലോചനയിൽ സംവിധായകൻ ഒമർ ലുലു. തന്റെ ഫേസ്ബുക്ക് പേജിൽ നൽകിയ ഒരു കമന്റിലൂടെയാണ് ഒമർ ഇക്കാര്യം പുറത്തു വിട്ടത്. ഒരു മാസ് സിനിമ വേണ്ടേ എന്നുള്ള ആരാധകന്റെ ചോദ്യത്തിന് ഒമർ ലുലുവിന്റെ മറുപടി ഇതായിരുന്നു. 'മമ്മൂക്കാക്ക് വേണ്ടി പക്കാ ഒരു മാസ് സിനിമ ഡെന്നിസ് ജോസഫ് സാറും ഞാനും കൂടി പ്ലാൻ ചെയ്യുന്നുണ്ട്. ഞാൻ എന്നും ഈ തമാശ കളിച്ചു നടന്നാൽ ശരിയാവില്ല, ഇടയ്ക്കു ഒരു മാസൊക്കെ വേണ്ടേ'.
നിരവധി സൂപ്പർ ഹിറ്റുകൾക്ക് തിരക്കഥ എഴുതുകയും സംവിധാനവും ചെയ്തിട്ടുള്ള ഡെന്നിസ് ജോസഫ് ആണ് തന്റെ പുതിയ ചിത്രത്തിന്റെ രചന നിർവഹിക്കുക എന്ന സൂചനയും കമന്റിൽ ഒമർ ലുലു നൽകുന്നു. മമ്മൂട്ടിയുടെ സൂപ്പർ ഹിറ്റുകളായ നിറക്കൂട്ട്, കോട്ടയം കുഞ്ഞച്ചൻ, സംഘം, നായർ സാബ്, ശ്യാമ എന്നിവക്കു പുറമെ നമ്പർ 20 മദ്രാസ് മെയിൽ, രാജാവിന്റെ മകൻ, ഇന്ദ്രജാലം, ആകാശദൂത്, ഭൂമിയിലെ രാജാക്കന്മാർ, ഗാന്ധർവം, വഴിയോരക്കാഴ്ചകൾ എന്നീ ചിത്രങ്ങൾ പ്രേക്ഷകർക്ക് സമ്മാനിച്ചത് ഡെന്നിസ് ജോസഫ് ആണ്.
