വടകര- പൗരത്വ സംരക്ഷണ വേദി കഴിഞ്ഞ ദിവസം വടകരയിൽ സംഘടിപ്പിച്ച ഭരണഘടന സംരക്ഷണ സംഗമത്തിൽ ദീപിക സിംഗ് രജാവത്തിന്റെ പ്രസംഗം പരിഭാഷപ്പെടുത്തിയ എം.യു.എം ഹയർ സെക്കൻഡറി സ്‌കൂൾ വിദ്യാർഥിനി ഫാത്തിമത്തുൽ ഷഫ്‌ന വേദിയിൽ താരമായി.
അര മണിക്കൂറിലേറെ സദസ്സിനെ ആവേശത്തിലാഴ്ത്തിയ ദീപികയുടെ പ്രസംഗത്തിന്റെ തനിമ ചോരാതെ ആത്മവിശ്വാസത്തോടെ പരിഭാഷ നടത്തിയ ഷഫ്‌നയെ നിറഞ്ഞ മനസ്സോടെ സദസ്സ് കൈയ്യടിച്ച് സ്വീകരിച്ചു. ഷഫ്‌നയെ പൗരത്വ സംരക്ഷണ വേദി അനുമോദിച്ചു.
പ്രൊഫ. കെ.കെ.മഹമൂദ് ഉപഹാര സമർപ്പണം നടത്തി. പൗരത്വ സംരക്ഷണ വേദി കൺവീനർ എം.പി.അബ്ദുൽ കരിം, വി.ഫൈസൽ, കരകെട്ടി ഇബ്രാഹിം ഹാജി, കെ.സജീവൻ, കെ.ടി.യൂനുസ്, അഷ്‌റഫ് ആന്റിക്, വി.കെ.അസീസ്, എം.ഫൈസൽ സംസാരിച്ചു. എടച്ചേരി തലായി സ്വദേശിയായ ഷഫ്‌ന പ്ലസ് വൺ സയൻസ് വിദ്യാർഥിയാണ്.
