ന്യൂദല്‍ഹി- പൗരത്വ നിയമ ഭേദഗതിയുടെ അടിസ്ഥാനത്തില്‍ പൗരത്വം നല്‍കുന്ന നടപടികള്‍ സ്റ്റേ ചെയ്യണമെന്നാവശ്യപ്പെട്ട് മുസ്ലിം ലീഗ് സുപ്രീം കോടതിയെ സമീപിച്ചു. ദേശീയ ജനസംഖ്യ റജിസ്റ്ററിനുള്ള നടപടികള്‍ നിര്‍ത്തിവെക്കാന്‍ നിര്‍ദേശിക്കണമെന്നാവശ്യപ്പെട്ടും ലീഗ് ഹരജി നല്‍കിയിട്ടുണ്ട്.
ജനുവരി പത്തിനാണ് കേന്ദ്രസര്‍ക്കാര്‍പൗരത്വ ഭേദഗതി നിയമത്തിനുള്ള വിജ്ഞാപനം പുറപ്പെടുവിച്ചത്. ഇതിനു തൊട്ടു പിന്നാലെ ഉത്തര്‍പ്രദേശ് സര്‍ക്കാര്‍ പൗരത്വ ഭേദഗതി നിയമം നടപ്പിലാക്കാനുള്ള നടപടികള്‍ ആരംഭിച്ചു. ഏതാണ്ട് 40,000 പേരുടെ പട്ടിക കേന്ദ്രസര്‍ക്കാറിന് കൈമാറിയിരിക്കയാണ്.
കേന്ദ്ര സര്‍ക്കാര്‍ പുറത്തിറക്കിയ സി.എ.എ വിജ്ഞാപനത്തിന്റെ അടിസ്ഥാനത്തിലുള്ള നടപടികള്‍ സ്റ്റേ ചെയ്യണമെന്നാണ് ഹരജിയിലെ പ്രധാന ആവശ്യം. പൗരത്വ ഭേദഗതി നിയമം ഭരണഘടനാപരമാണോ എന്ന് പരിശോധന നടത്തി വരികയാണ്. അന്തിമ നടപടി വരും വരെ ഇത് നിര്‍ത്തിവെക്കണമെന്ന് ആവശ്യപ്പെട്ടാണ് പി.കെ കുഞ്ഞാലിക്കുട്ടി എം.പി മുസ്ലിം ലീഗിനു വേണ്ടി ഹരജി നല്‍കിയിരിക്കുന്നത്. അഭിഭാഷകന്‍ ഹാരിസ് ബീരാനാണ് ഹരജി ഫയല്‍ ചെയ്തത്.
ഇതോടൊപ്പം സുപ്രീം കോടതിയില്‍ സമര്‍പ്പിച്ച രണ്ടാമത്തെ ദേശീയ ജനസംഖ്യ റജിസ്റ്റര്‍ നടപടികള്‍ നിര്‍ത്തി വെക്കാന്‍ നിര്‍ദേശിക്കണമെന്ന് ആവശ്യപ്പെട്ടു. ദേശീയപൗരത്വ പട്ടികയും ദേശീയ ജനസംഖ്യ റജിസ്റ്ററുമായി ബന്ധമുണ്ടോ എന്ന കാര്യം വ്യക്തമാക്കാന്‍ കേന്ദ്ര സര്‍ക്കാരിനോട് നിര്‍ദേശിക്കണമെന്നും ആവശ്യപ്പെട്ടിട്ടുണ്ട്.
