ദമാം- ദമാം ഒ ഐ സി സി സംഘടിപ്പിക്കുന്ന ഗാന്ധിയുടെ നൂറ്റിയമ്പതാം വാർഷികാഘോഷ ചടങ്ങുകളിൽ പങ്കെടുക്കുന്നതിനായി പ്രതിപക്ഷ നേതാവ് രമേശ് ചെന്നിത്തല ദമാമിൽ എത്തി. ഇന്ന് പുലർച്ചെ മൂന്നു മണിക്ക് കിംഗ് ഫഹദ് ഇൻറ്റർ നാഷണൽ എയർപോർട്ടിൽ എത്തിയ നേതാവിന് ഒ ഐ സി സി ദമാം റീജിണൽ കമ്മറ്റിയുടെ നേതൃത്വത്തിൽ ഗംഭീര സ്വീകരണം നൽകി. ഓ ഐ സി സി ഗ്ലോബൽ വൈസ് പ്രസിഡൻറ്റ് അഹമ്മദ് പുളിക്കൽ, റീജിണൽ കമ്മറ്റി പ്രസിഡണ്ട് ബിജു കല്ലുമല , ഒ ഐ സി സി നാഷണൽ പ്രസിഡന്‍റ് പി..എം നജീബ് എന്നിവർ ബൊക്ക നൽകി സ്വീകരിച്ചു. ഒ ഐ സി സി പ്രവർത്തകരും പ്രതിപക്ഷ നേതാവിനെ സ്വീകരിക്കാനായി എയർപോർട്ടിൽ എത്തിയിരുന്നു .രണ്ട് ദിവസത്തെ സന്ദർശനത്തിനായി ദമാമിലെത്തിയ രമേഷ് ചെന്നിത്തല ഇന്ന് വൈകുന്നേരം മാധ്യമ പ്രവർത്തകരെ കാണും.നാളെ ഒ ഐ സി സി ദമാം റീജിണൽ കമ്മറ്റി സംഘടിപ്പിക്കുന്ന സമ്മേളനത്തിൽ പങ്കെടുക്കും .ഇന്നും നാളെയുമായി വിവിധ സംഘടനാ പ്രതിനിധികൾ പ്രതിപക്ഷ നേതാവുമായി കൂടിക്കാഴ്ച നടത്തുമെന്നും നേതാക്കൾ അറിയിച്ചു.
