കൊച്ചി-അമല പോള്‍ ഇപ്പോള്‍ പഴയ അമലാ പോളല്ല, ജീവിത ശൈലിയും ഗെറ്റപ്പും എന്തിനു കഥാപാത്രങ്ങളുടെ തിരഞ്ഞെടുപ്പ് പോലും ആകെ മാറി. ആരും ചെയ്യാന്‍ മടിക്കുന്ന വേഷമാണ് ആടൈയില്‍ ചെയ്തത്. സെലിബ്രിറ്റികളുടെ നക്ഷത്രലോകത്തു നിന്നും മണ്ണിലേക്കിറങ്ങാന്‍ ഇഷ്ടപ്പെടുകയാണ് നടി. അതുകൊണ്ടാണ് മുമ്പ് പോണ്ടിച്ചേരി രജിസ്‌ട്രേഷന്റെ പേരില്‍ വിവാദത്തിലായ ബെന്‍സ് കാര്‍ പോലും വിറ്റത്.
ഒരു മാസം 20,000 രൂപയാണ് എന്റെ ജീവിതച്ചെലവ്. ബെന്‍സ് വിറ്റു. അത് എന്റെ അഹംബോധത്തെ വെറുതെ ഊട്ടി വളര്‍ത്തുന്ന ഒന്നായിരുന്നു. സൈക്കിളില്‍ യാത്ര ചെയ്ത് വീട്ടിലേയ്ക്കുള്ള സാധനങ്ങള്‍ വാങ്ങും. യോഗയും പൂന്തോട്ടവുമാണ് ജീവിക്കാനുള്ള ഊര്‍ജ്ജം തന്നിരുന്നത്. എനിക്ക് ഹിമാലയത്തില്‍ ജീവിക്കാനായിരുന്നു ആഗ്രഹം. അതിന് കഴിയാത്തതുകൊണ്ട് പോണ്ടിച്ചേരി തെരഞ്ഞെടുത്തു. അവിടെയുള്ള സുഹൃത്തുക്കള്‍ക്കൊപ്പം ഭക്ഷണം കഴിക്കും, നൃത്തം ചെയ്യും, പാട്ടുപാടും,ഗിത്താര്‍ വായിക്കും. ആയുര്‍വേദ ഭക്ഷണ രീതിയാണ് പിന്തുടരുന്നത്. ഇപ്പോള്‍ ബ്യൂട്ടി പാര്‍ലറില്‍ പോലും പോകാറില്ല. മുള്‍ട്ടാണിമിട്ടിയും ചെറുപയര്‍പൊടിയും മാത്രമാണണ് സൗന്ദര്യവര്‍ധക വസ്തുക്കളായി ഉപയോഗിക്കാറുള്ളത്. എല്ലാ ദിവസവും കടല്‍ത്തീരത്ത് പോകും. ശുദ്ധവായു ആസ്വദിക്കും. ഇപ്പോള്‍ ഞാന്‍ പ്രണയത്തിലാണ്. അയാളെ വിവാഹം കഴിക്കാനും കുഞ്ഞുണ്ടാകാനും കുഞ്ഞുങ്ങളെ ദത്തെടുക്കാനും ഞാന്‍ ആഗ്രഹിക്കുന്നു.
'ആടൈ'യുടെ തിരക്കഥ അദ്ദേഹത്തിന് വായിക്കാന്‍ കൊടുത്തിരുന്നു. സ്വയം തീരുമാനങ്ങള്‍ എടുക്കാനാണ് അദ്ദേഹം എന്നോട് പറഞ്ഞത്. സിനിമ കണ്ടതിന് ശേഷം അദ്ദേഹം പറഞ്ഞു... 'നീ മോശം നടിയാണെന്ന്'. എന്റെ എല്ലാ തീരുമാനങ്ങള്‍ക്കും അദ്ദേഹത്തിന്റെ നല്ല പിന്തുണയുണ്ട്. അയാളുടെ സ്‌നേഹം എന്റെ മനസ്സിലെ വിഷമങ്ങള്‍ ഇല്ലാതാക്കിയെന്നും അമല പറഞ്ഞു.
പതിനേഴാമത്തെ വയസ്സില്‍ സിനിമയിലേയ്ക്ക് എത്തിയ ആളാണ് ഞാന്‍. എനിക്ക് ഒന്നും അറിയില്ലായിരുന്നു. അതിനിടെ വിവാഹം. ആ വിവാഹ ജീവിതം പരാജയപ്പെട്ടപ്പോള്‍ എനിക്ക് അത് കൈാര്യം ചെയ്യാന്‍ കഴിഞ്ഞിരുന്നില്ല. കാരണം, ലോകം മുഴുവന്‍ എതിരായിരുന്നു. ഞാന്‍ ഒറ്റയ്ക്ക് ആണെന്നും എങ്ങോട്ടെങ്കിലും ഓടിപ്പോകാമെന്നും വരെ തോന്നി. വല്ലാത്ത വേദന നിറഞ്ഞ നിമിഷങ്ങള്‍. പിന്നീടങ്ങോട്ട് എന്നെ തന്നെ കുറ്റപ്പെടുത്തി കാലം കഴിച്ചു.
ഇതിനിടെ, 2016 ല്‍ നടത്തിയ ഒരു ഹിമാലയന്‍ യാത്രയാണ് ജീവിതം മാറ്റി മറിച്ചത്. ഒരു ബാക്ക്പാക്കില്‍ വസ്ത്രങ്ങളും സണ്‍സ്‌ക്രീനും ലിപ് ബാമുമായി ഇറങ്ങിയത് ഇപ്പോഴും ഓര്‍മ്മയുണ്ട്. മൊബൈല്‍ ഫോണ്‍ പോലും ഉപയോഗിക്കാതെ ടെന്റില്‍ ഉറങ്ങി. അവിടെ ഞാന്‍ എന്നെ തന്നെ കണ്ടെത്തുകയായിരുന്നു' അമല പറയുന്നു.
