കൊച്ചി- ആലുവയില്‍ വീട്ടുകാര്‍ പുറത്ത് പോയ സമയത്ത് വീട് കുത്തിത്തുറന്ന് വന്‍ കകവര്‍ച്ച. വളര്‍ത്തു നായയെ മയക്കി വീട്ടിനകത്ത് കടന്ന മോഷ്ടാക്കള്‍ 30 ലക്ഷത്തോളം രൂപ വിലവരുന്ന ആഭരണങ്ങളും പണവുമാണ് കവര്‍ന്നത്.
ആലുവ തോട്ടക്കാട്ടുകര കോണ്‍വന്റിന് സമീപം പൂണേലില്‍ ജോര്‍ജ് മാത്യുവിന്റെ വീട്ടിലാണ് കവര്‍ച്ച . 20 പവന്‍ സ്വര്‍ണം, 25 ലക്ഷം രൂപയുടെ വജ്രാഭരണങ്ങളും യൂറോയും ഡോളറുകളുമടക്കം 30 ലക്ഷം ലക്ഷം രൂപയുടെ നഷ്ടം കണക്കാക്കുന്നു.
മുറിയിലെ മര അലമാര തകര്‍ത്ത് ലോക്കര്‍ പൊളിച്ചാണ് ആഭരണങ്ങള്‍ എടുത്തത്. വിദേശത്തായിരുന്ന വീട്ടുകാര്‍ കുറച്ച് ദിവസങ്ങള്‍ക്ക് മുന്‍പാണ് ആഭരണങ്ങള്‍ ബാങ്കില്‍ നിന്നെടുത്തത്. വെള്ളിയാഴ്ച വൈകിട്ട് 6.30 നും 11:30 നുമിടയിലാണ് കവര്‍ച്ച നടന്നത്. ജോര്‍ജ് മാത്യുവും കുടുംബവും എറണാകുളത്ത് ഒരു ചടങ്ങില്‍ പങ്കെടുത്ത് രാത്രി 11.30 യോടെ മടങ്ങിയെത്തിയപ്പോഴാണ് മോഷണ വിവരമറിഞ്ഞത്. ഫോറന്‍സിക് വിദഗ്ധരും പോലീസും സ്ഥലത്തെത്തി അന്വേഷണമാരംഭിച്ചു.
