തിരുവനന്തപുരം- സഹകരണ സംഘം തെരഞ്ഞെടുപ്പിനെ ചൊല്ലിയുള്ള തര്‍ക്കത്തിനൊടുവില്‍ തമ്മിലടിച്ച സംഭവത്തില്‍ 14 പോലീസുകാര്‍ക്കെതിരെ നടപടി. ആദ്യ ഘട്ടമായി എട്ട് പേരെ സസ്‌പെന്‍ഡ് ചെയ്തു.
സൊസൈറ്റി ഓഫീസ് ഉപരോധിച്ച് സമരം നടത്തിയതടക്കം ഗുരുതര അച്ചടക്ക ലംഘനം നടത്തിയതിന്റെ പേരില്‍ സിറ്റി പോലീസ് കമ്മീഷണറാണ് നടപടി സ്വീകരിച്ചത്. ശനി രാവിലെയാണ് തിരിച്ചറിയല്‍ കാര്‍ഡ് വൈകുന്നതുമായി ബന്ധപ്പെട്ട വിഷയത്തില്‍ ഇടത് -വലത് സംഘടനകളില്‍പെട്ട പോലീസുകാര്‍ തമ്മില്‍ ആദ്യം വാക്കുതര്‍ക്കവും പിന്നീട് ഉന്തും തള്ളുമുണ്ടായത്.
കുത്തിയിരുന്ന് സമരം നടത്തുകയും മുദ്രാവാക്യം വിളിക്കുകയും ചെയ്തത് ഗുരുതര അച്ചടക്കലംഘനമാണെന്ന് വിലയിരുത്തിയാണ് രണ്ട് വനിതാ സിവില്‍ ഓഫീസര്‍മാരടക്കം എട്ട് പേരെ സസ്‌പെന്‍ഡ് ചെയ്തത്. പോലീസ് സേനക്കു തന്നെ നാണക്കേടുണ്ടാക്കുന്ന സംഭവം എന്നാണ് അച്ചടക്കലംഘനത്തെ സസ്‌പെന്‍ഷന്‍ ഉത്തരവില്‍ സിറ്റി പോലീസ് കമ്മീഷണര്‍ വിശേഷിപ്പിച്ചത്.
ഈ മാസം 27 നാണ് സഹകരണസംഘം തെരഞ്ഞെടുപ്പ്. തെരഞ്ഞെടുപ്പുമായി ബന്ധപ്പെട്ടുണ്ടാകുന്ന അനിഷ്ടസംഭവങ്ങളില്‍ നടപടിയെടുക്കാന്‍ ഹൈക്കോടതി നിര്‍ദേശമുണ്ട്.
