മലപ്പുറം- ആലത്തൂരില് ഇടതുമുന്നണിയെ പരാജയപ്പെടുത്തി മിന്നും വിജയം നേടിയ രമ്യാ ഹരിദാസിനോടൊപ്പം താനും കുടുംബവും നില്ക്കുന്ന ചിത്രം പങ്കുവെച്ച് മുസ്്ലിം ലീഗ് നേതാവ് പി.കെ. കുഞ്ഞാലിക്കുട്ടിയുടെ അഭിനന്ദനം.
'കേരളത്തിന്റെ അഭിമാനം, ആലത്തൂരിന്റെ പാര്ലമെന്റ് പ്രതിനിധി. ഈ ലോക്സഭാ തെരഞ്ഞെടുപ്പിലെ ഏറ്റവും തിളക്കമുള്ള വിജയത്തിന്റെ ഉടമ കേരളത്തിന്റെ പെങ്ങളൂട്ടി രമ്യാ ഹരിദാസിനൊപ്പം ഞാനും എന്റെ കുടുംബവും. അഭിനന്ദനങ്ങള് രമ്യാ ഹരിദാസ്.' ഈ കുറിപ്പിനൊപ്പമാണ് കുഞ്ഞാലിക്കുട്ടി രമ്യയോടൊപ്പമുള്ള ചിത്രം പങ്കുവെച്ചത്.
തെരഞ്ഞെടുപ്പ് പ്രചാരണ സമയത്ത് ദ്വയാര്ഥ പ്രയോഗത്തിലൂടെ വിവാദമുണ്ടാക്കിയ ഇടതുമുന്നണി കണ്വീനര് എ.വിജയരാഘവനെതിരായ കുഞ്ഞാലിക്കുട്ടിയുടെ മറുപടിയായാണ് പോസ്റ്റിനെ സമൂഹ മാധ്യമ ഉപയോക്താക്കള് വിശേഷിപ്പിക്കുന്നത്.
തെരഞ്ഞെടുപ്പ് പ്രചാരണ സമയത്ത് രമ്യയെയും കുഞ്ഞാലിക്കുട്ടിയെയും ചേര്ത്തു എല്ഡിഎഫ് കണ്വീനര് എ.വിജയരാഘവന് നടത്തിയ പരാമര്ശം വന്വിവാദത്തിന് വഴിവച്ചിരുന്നു. രമ്യാ ഹരിദാസ് കുഞ്ഞാലിക്കുട്ടിയെ സന്ദര്ശിച്ചതിനെക്കുറിച്ചായിരുന്നു അദ്ദേഹത്തിന്റെ വിവാദ പരാമര്ശം. സ്ഥാനാര്ഥിത്വം ഉറപ്പിച്ചതോടെ രമ്യ ആദ്യം ഓടിയെത്തിയത് പാണക്കാട്ടേക്കാണ്. പാണക്കാട് തങ്ങളെക്കണ്ട് പിന്നെ ഓടിയത് പി.കെ.കുഞ്ഞാലിക്കുട്ടിയെ കാണാനാണ്. ആ കുട്ടിയുടെ കാര്യം എന്താവുമെന്ന് പറയുന്നില്ലെന്നുമായിരുന്നു വിജയരാഘവന്റെ പ്രസംഗം.
