കൊച്ചി- കാറില് സഞ്ചരിക്കവെ ബൈക്കിലെത്തിയ അജ്ഞാത സംഘം ആക്രമിച്ചതായി സോളാര് കേസ് പ്രതി സരിതാ എസ് നായര് പോലീസില് പരാതി നല്കി. കൊച്ചി ചക്കരപ്പറമ്പ് പരിസരത്ത് വെച്ച് ബൈക്കിലെത്തിയ മൂന്നംഗ സംഘം ആക്രമിക്കുകയും വാഹനത്തിന്റെ ഗ്ലാസ് തകര്ക്കുകയും ചെയ്തുവെന്നാണ് പരാതി.
തനിക്കെതിരെ ആരോ നല്കിയ ക്വട്ടേഷനാണ് ആക്രണത്തിന് പിന്നിലെന്ന് സരിത ആരോപിച്ചു. തിങ്കളാഴ്ച
രാത്രി 8.30 ഓടെയാണ് തന്റെ കാറിന് നേരെ രണ്ട് ബൈക്കുകളിലായെത്തിയ സംഘം ആക്രമണം അഴിച്ചുവിട്ടതെന്ന് സരിത പാലാരിവട്ടം പോലീസില് പരാതിയില് പറയുന്നു. ബുള്ളറ്റിലെത്തിയ അക്രമികളില് ഒരാള് കാറിന് മുന്നിലെത്തി വാഹനം നിര്ത്താന് ആവശ്യപ്പെട്ടെന്നും ഈ സമയം മറ്റൊരു ബൈക്കിലുണ്ടായിരുന്ന സംഘം മാരകായുധങ്ങളുമായി കാറിന്റെ ഗ്ലാസ് തകര്ത്തുവെന്നും സരിത പറഞ്ഞു.
ആക്രമണത്തില് കാറിന്റെ ഇടതുവശത്തെ ഗ്ലാസ് തകര്ന്നു. അക്രമികള് തന്റെ വാഹനം നിര്ത്താന് ആവശ്യപ്പെട്ടെങ്കിലും അതിന് മുതിരാതെ നേരെ പാലാരിവട്ടം പോലീസ് സ്റ്റേഷനില് എത്തുകയായിരുന്നുവെന്നും സരിത പറഞ്ഞു.
ഉത്തര്പ്രദേശ് രജിസ്ട്രേഷനിലുള്ള ബുള്ളറ്റിന്റെ നമ്പര് പോലീസിന് കൈമാറിയിട്ടുണ്ട്. ബുള്ളറ്റിലെത്തിയ ആള് മുഖം മറച്ചിരുന്നില്ലെന്നും കണ്ടാല് തിരിച്ചറിയാമെന്നും സരിത പറഞ്ഞു.
