റിയാദ് -ഡ്യൂട്ടി കഴിഞ്ഞ് റൂമിലേക്ക് സ്കൂട്ടറിൽ പോകുകയായിരുന്ന മലപ്പുറം കൊണ്ടോട്ടിസ്വദേശി കാറിടിച്ച് മരിച്ചു. പുളിക്കൽ മണാകുന്നൻ അബ്ദുല്ലത്തീഫാ(49)ണ് ഉച്ചക്ക് റൗദയിൽ അപകടത്തിൽ മരിച്ചത്. റൗദയിൽ ഇദ്ദേഹം ജോലി ചെയ്തിരുന്ന ബൂഫിയയിൽനിന്ന് ഡ്യൂട്ടി കഴിഞ്ഞ് സ്കൂട്ടറിൽ റൂമിലേക്ക് പോകുമ്പോൾ കാറിടിച്ച് തെറിച്ച് വീണ് ഡിവൈഡറിൽ തലയിടിക്കുകയും തൽക്ഷണം മരിക്കുകയുമായിരുന്നു. 25 വർഷമായി റിയാദിൽ ജോലി ചെയ്തുവരികയായിരുന്നു.
നസീറയാണ് ഭാര്യ. മക്കൾ: അംജദ ജാസ്മിൻ, അംജദ ഫർഹത്ത്, അമാന ഷെറിൻ, മുഹമ്മദ് അഫ്ലഹ്. മരുമകൻ: ഇർഷാദ് വൈദ്യരങ്ങാടി. സഹോദരങ്ങൾ: യൂസുഫ്, ബീരാൻ കുട്ടി ഗുജറാത്ത്, ഹംസ, ഉമ്മാച്ചക്കുട്ടി. ശുമൈസി ആശുപത്രിയിലുള്ള മയ്യിത്ത് നടപടിക്രമങ്ങൾ പൂർത്തിയാക്കി നാട്ടിലെത്തിക്കുന്നതിന് ബന്ധുവായ യർബാസ്, കെ.എം.സി.സി വെൽഫയർ വിംഗ് പ്രവർത്തകരായ സിദ്ദീഖ് തുവ്വൂർ, റഫീഖ് മഞ്ചേരി, ശറഫു പുളിക്കൽ, സലീം സിയാംകണ്ടം തുടങ്ങിയവർ രംഗത്തുണ്ട്.
