തിരുവനന്തപുരം- കോട്ടയം ലോക്‌സഭാ സീറ്റ് സംബന്ധിച്ച് മാണി- ജോസഫ് വിഭാഗങ്ങള്‍ തമ്മില്‍ തര്‍ക്കം തുടരുന്നതിനിടെ, നിലപാട് കടുപ്പിച്ച് പി.ജെ.ജോസഫ് എംഎല്‍എ. പ്രശ്‌നപരിഹാരത്തിനുള്ള സാധ്യതകള്‍ തേടി ജോസഫ് യുഡിഎഫ് നേതാക്കളെ കണ്ടു. എഐസിസി ജനറല്‍ സെക്രട്ടറി ഉമ്മന്‍ ചാണ്ടി, പ്രതിപക്ഷ നേതാവ് രമേശ് ചെന്നിത്തല എന്നിവരുമായാണ് ജോസഫ് കൂടിക്കാഴ്ച നടത്തിയത്. മാണിയുമായി ഒത്തു പോകാനാകില്ലെന്നാണ് ജോസഫ് നേതാക്കളോട് പറഞ്ഞത്.
മോന്‍സ് ജോസ്ഫ് എംഎല്‍എയ്‌ക്കൊപ്പമാണ് പി.ജെ.ജോസഫ് ഉമ്മന്‍ ചാണ്ടിയെ കാണാനെത്തിയത്. കെ.സി.ജോസഫ് എംഎല്‍എയും കൂടിക്കാഴ്ചയില്‍ സംബന്ധിച്ചു. പത്തു മിനിറ്റ് നീണ്ടുനിന്ന കൂടിക്കാഴ്ചയില്‍ വിട്ടുവീഴ്ചകള്‍ക്ക് തയാറല്ലെന്ന് ജോസഫ് ഉമ്മന്‍ചാണ്ടിയെ അറിയിച്ചു. മാണി ഏകപക്ഷീയമായി തീരുമാനങ്ങള്‍ അടിച്ചേല്‍പിക്കുകയാണെന്നും ഇത് അംഗീകരിക്കാനാകില്ലെന്നും ജോസഫ് ഉമ്മന്‍ചാണ്ടിയോട് പറഞ്ഞതായാണ് വിവരം. പ്രശ്‌നത്തിന് ഉചിതമായ രീതിയിയില്‍ പരിഹാരമുണ്ടാക്കാമെന്ന് ഉമ്മന്‍ചാണ്ടി ജോസഫിന് ഉറപ്പുനല്‍കി.
ഒരാളോട് മാത്രം സംസാരിച്ചതുകൊണ്ട് കാര്യമില്ലെന്നും കാര്യങ്ങള്‍ യുഡിഎഫാണ് തീരുമാനിക്കേണ്ടതെന്നും കൂടിക്കാഴ്ചയ്ക്കു ശേഷം പുറത്തെത്തിയ ജോസഫ് അറിയിച്ചു. കൂടുതല്‍ പ്രതികരണങ്ങള്‍ യുഡിഎഫ് നേതാക്കളുമായുള്ള ചര്‍ച്ചകള്‍ക്ക് ശേഷം ആകാമെന്നും ജോസഫ് കൂട്ടിച്ചേര്‍ത്തു.
ഉമ്മന്‍ചാണ്ടിയെ കണ്ടതിനു പിന്നാലെ കന്റോണ്‍മെന്റ് ഹൗസിലെത്തി പ്രതിപക്ഷ നേതാവ് രമേശ് ചെന്നിത്തലയുമായും ജോസഫ് കൂടിക്കാഴ്ച നടത്തി.
