തൃശൂര്‍ - വൃദ്ധസദനത്തില്‍ അനധികൃതമായി പാര്‍പ്പിച്ചെന്ന ഗുരുവായൂര്‍ സ്വദേശിനിയുടെ പരാതിയില്‍ വനിതാ കമ്മിഷന്‍ വൃദ്ധസദനം സന്ദര്‍ശിച്ച് തെളിവെടുക്കുമെന്ന് കമ്മീഷന്‍ അധ്യക്ഷ എം.സി.ജോസഫൈന്‍. ടൗണ്‍ഹാളില്‍ നടന്ന വനിതാ കമ്മീഷന്‍ മെഗാ അദാലത്തിന് ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അവര്‍.
തന്റെ താല്‍പര്യത്തിന് വിരുദ്ധമായി മകന്‍ തന്നെ വൃദ്ധസദനത്തില്‍ പാര്‍പ്പിക്കുന്നുവെന്നാണ് വൃദ്ധയുടെ പരാതി. പരാതി കമ്മീഷന്‍ വിശദ്ധമായി അന്വേഷിക്കുമെന്നും ഇതിന്റെ ഭാഗമായി കമ്മീഷന്‍ പ്രതിനിധി നാളെ ഗുരുവായൂരിലുള്ള വൃദ്ധസദനം സന്ദര്‍ശിക്കുമെന്നും അവര്‍ പറഞ്ഞു. തുടര്‍ന്ന് കമ്മീഷന്‍ അധ്യക്ഷയും സന്ദര്‍ശനം നടത്തും.
