മക്ക - അര ലക്ഷത്തോളം റിയാലുമായി ഇന്ത്യക്കാരനെ ഹൈവേ പോലീസ് പിടികൂടി. ഇന്ത്യക്കാരന്റെ വാഹനത്തിന്റെ ഡിക്കിയിൽ സൂക്ഷിച്ച കാർട്ടനിൽ ഒളിപ്പിച്ച നിലയിൽ 49,029 റിയാൽ കണ്ടെത്തി. മക്ക-ജിദ്ദ എക്‌സ്പ്രസ്‌വേയിൽ വെച്ച് ഇന്ത്യക്കാരൻ ഓടിച്ച വാഹനം സംശയം തോന്നി ഹൈവേ പോലീസുകാർ തടഞ്ഞുനിർത്തി പരിശോധിക്കുകയായിരുന്നു. പണത്തിന്റെ ഉറവിടം തെളിയിക്കുന്നതിന് ഇന്ത്യക്കാരന് സാധിച്ചില്ല. തുടർന്ന് എഫ്.ഐ.ആർ തയാറാക്കി തൊണ്ടി സഹിതം ഇന്ത്യക്കാരനെ ബഹ്‌റ പോലീസിന് കൈമാറി.
