സിനിമ നാടക രംഗത്ത് സജീവ സാന്നിധ്യമായിരുന്ന കെ.ടി.സി അബ്ദുല്ല അന്തരിച്ചു. 82 വയസ്സായിരുന്നു. കോഴിക്കോട് പി.വി.എസ് ആശുപത്രിയിലായിരുന്നു അന്ത്യം. 1977ല് രാമു കാര്യാട്ട് സംവിധാനം ചെയ്ത ദ്വീപ് എന്ന ചിത്രത്തിലൂടെയാണ് അഭിനയരംഗത്തെത്തിയത്. അറബിക്കഥ, ഗദ്ദാമ, സുഡാനി ഫ്രം നൈജീരിയ തുടങ്ങിയവയാണ് ശ്രദ്ധേയമായ ചിത്രങ്ങള്. കോഴിക്കോട്ട് വെച്ച് ഗൃഹലക്ഷ്മി പ്രൊഡക്ഷന്സ് നിര്മിച്ച ചിത്രങ്ങളിലെല്ലാം ചെറിയ റോളിലെങ്കിലും അബ്ദുല്ലയുണ്ടാവാറുണ്ടായിരുന്നു.
കോഴിക്കോട്ടെ സംഗം, പുഷ്പ, കല്പക, ശ്രീ തിയേറ്ററുകളില് ഗൃഹലക്ഷ്മിയുടെ പടങ്ങളുടെ പ്രിവ്യൂ ഷോ നടക്കുമ്പോള് നിര്മാതാവ് പി.വി.ജിയ്ക്കൊപ്പമുണ്ടാവാറുള്ള അബ്ദുല്ല നഗരത്തിലെ മാധ്യമ പ്രവര്ത്തകരുടെ ഉറ്റമിത്രമാണ്.
1959ലാണ് കെ. അബ്ദുല്ല കെ.ടി.സിയില് ജോലിയില് പ്രവേശിക്കുന്നത്. അതോടെയാണ് കെ.ടി.സി അബ്ദുല്ല എന്ന് പേര് വന്നത്. നാടകങ്ങളിലൂടെയാണ് അബ്ദുല്ല അഭിനയരംഗത്തെത്തുന്നത്. കോഴിക്കോട് ആകാശവാണിയുടെ എ ഗ്രേഡ് ആര്ടിസ്റ്റുമായിരുന്നു.
കോഴിക്കോട് പന്നിയങ്കര സ്വദേശിയാണ്. ഡ്രൈവര് ഉണ്ണിമോയിന്റെയും ബീപാത്തുവിന്റെയും മകനായി 1936ല് പാളയം കിഴക്കെക്കോട്ട പറമ്പിലാണ് അബ്ദുല്ല ജനിച്ചത്.
ഷാനു സമദ് സംവിധാനം ചെയ്യുന്ന മൊഹബ്ബത്തിന് കുഞ്ഞബ്ദുള്ള എന്ന ചിത്രത്തില് പ്രധാന വേഷത്തില് അഭിനയിച്ചു കൊണ്ടിരിക്കുകയായിരുന്നു. ഷൂട്ടിങ്ങ് പുരോഗമിക്കുന്നതിനിടെയാണ് അന്ത്യം.
