മുംബൈ- പിന്‍വലിച്ച രണ്ടായിരം രൂപ നോട്ടുകളില്‍ 97.62 ശതമാനവും ബാങ്കിംഗ് സംവിധാനത്തിലേക്ക് തിരിച്ചെത്തിയെന്നും 8,470 കോടി രൂപ മാത്രമാണ് ഇപ്പോഴും പൊതുജനങ്ങളിലുള്ളതെന്നും റിസര്‍വ് ബാങ്ക് ഓഫ് ഇന്ത്യ അറിയിച്ചു.
2023 മെയ് 19 നാണ് 2000 രൂപ മൂല്യമുള്ള ബാങ്ക് നോട്ടുകള്‍ പ്രചാരത്തില്‍ നിന്ന് പിന്‍വലിക്കുന്നതായി ആര്‍ബിഐ പ്രഖ്യാപിച്ചത്.
2000 രൂപ നോട്ടുകള്‍ പിന്‍വലിച്ചതായി പ്രഖ്യാപിച്ച 2023 മെയ് 19ന് വ്യാപാരം അവസാനിച്ചപ്പോള്‍ 3.56 ലക്ഷം കോടി രൂപയായിരുന്ന 2000 രൂപ നോട്ടുകളുടെ ആകെ മൂല്യം 8,470 കോടി രൂപയായി കുറഞ്ഞുവെന്ന് ആര്‍ബിഐ പ്രസ്താവനയില്‍ പറഞ്ഞു.
2023 മെയ് 19 വരെ പ്രചാരത്തിലുണ്ടായിരുന്ന 2000 രൂപ നോട്ടുകളില്‍ 97.62 ശതമാനവും തിരിച്ചെത്തിയതായി പ്രസ്താവനയില്‍ പറഞ്ഞു.
2,000 രൂപ നോട്ടുകള്‍ നിയമാനുസൃതമായി തുടരുമെന്നും ആര്‍ബിഐ കൂട്ടിച്ചേര്‍ത്തു.
രാജ്യത്തുടനീളമുള്ള 19 ആര്‍ബിഐ ഓഫീസുകളില്‍ ആളുകള്‍ക്ക് 2000 രൂപ ബാങ്ക് നോട്ടുകള്‍ നിക്ഷേപിക്കാനും മാറ്റി വാങ്ങാനും കഴിയും. ഇന്ത്യയിലെ അവരുടെ ബാങ്ക് അക്കൗണ്ടുകളിലേക്ക് ക്രെഡിറ്റ് ചെയ്യുന്നതിന് ആളുകള്‍ക്ക് 2000 രൂപ ബാങ്ക് നോട്ടുകള്‍ ഏത് തപാല്‍ ഓഫീസില്‍ നിന്നും ആര്‍ബിഐ ഇഷ്യൂ ഓഫീസിലേക്ക് ഇന്ത്യ പോസ്റ്റ് വഴി അയക്കാം.
2023 സെപ്റ്റംബര്‍ 30നകം നോട്ടുകള്‍ കൈമാറ്റം ചെയ്യാനോ ബാങ്ക് അക്കൗണ്ടില്‍ നിക്ഷേപിക്കാനോ പൊതുജനങ്ങളോടും സ്ഥാപനങ്ങളോടും ആദ്യം ആവശ്യപ്പെട്ടിരുന്നു. സമയപരിധി പിന്നീട് 2023 ഒക്ടോബര് ഏഴു വരെ നീട്ടി. ബാങ്ക് ശാഖകളിലെ നിക്ഷേപവും വിനിമയ സേവനങ്ങളും 2023 ഒക്ടോബര് ഏഴിന് നിര്‍ത്തലാക്കുകയും ചെയ്തു.
2023 ഒക്ടോബര് എട്ടു മുതല്‍, ആര്‍ബിഐയുടെ 19 ഓഫീസുകളില്‍ കറന്‍സി കൈമാറ്റം ചെയ്യാനോ തത്തുല്യമായ തുക ബാങ്ക് അക്കൗണ്ടിലേക്ക് ക്രെഡിറ്റ് ചെയ്യാനോ ഉള്ള സൗകര്യം വ്യക്തികള്‍ക്ക് നല്‍കിയിട്ടുണ്ട്.
അഹമ്മദാബാദ്, ബംഗളൂരു, ബേലാപൂര്‍, ഭോപ്പാല്‍, ഭുവനേശ്വര്‍, ചണ്ഡീഗഡ്, ചെന്നൈ, ഗുവാഹത്തി, ഹൈദരാബാദ്, ജയ്പൂര്‍, ജമ്മു, കാണ്‍പൂര്‍, കൊല്‍ക്കത്ത, ലഖ്‌നൗ, മുംബൈ, നാഗ്പൂര്‍, ന്യൂദല്‍ഹി, പട്‌ന, തിരുവനന്തപുരം എന്നിവിടങ്ങളിലാണ് 19 ആര്‍ബിഐ ഓഫീസുകള്‍ ബാങ്ക് നോട്ടുകള്‍ സ്വീകരിക്കുന്നത്.
2016 നവംബറില്‍ അന്നത്തെ 1000, 500 രൂപ നോട്ടുകള്‍ അസാധുവാക്കിയതിനെ തുടര്‍ന്നാണ് 2000 രൂപ ബാങ്ക് നോട്ടുകള്‍ അവതരിപ്പിച്ചിരുന്നത്.
