കൊച്ചി - ടി പി ചന്ദ്രശേഖരന് വധക്കേസിലെ പ്രതികള്ക്ക് വധശിക്ഷ നല്കണമെന്ന് പ്രോസിക്യൂഷന് ആവശ്യം ഉന്നയിക്കുന്നത് എന്തിനാണെന്ന് ഹൈക്കോടതി. കേസില് ഇപ്പോള് കുറ്റക്കാരെന്ന് കണ്ടെത്തിയ കെ കെ കൃഷ്ണനും ജ്യോതിബാബുവും നിരവധി ആരോഗ്യപ്രശ്നങ്ങള് ഉള്ളവരാണ്. എന്തുകൊണ്ടാണ് പ്രായമുള്ള പ്രതികള്ക്ക് വധശിക്ഷ വേണമെന്ന് ആവശ്യപ്പെടുന്നതെന്ന് പ്രോസിക്യൂഷനോട് കോടതി ചോദിച്ചു. വധശിക്ഷ നല്കുമ്പോള് ഇക്കാര്യങ്ങള് പരിഗണിക്കണമെന്ന് സുപ്രീം കോടതി വ്യക്തമാക്കിയിട്ടുണ്ടെന്നും ഹൈക്കോടതി പറഞ്ഞു. അപൂര്വങ്ങളില് അപൂര്വമായ കേസുകള്ക്ക് മാത്രം വധശിക്ഷ നല്കാനാണ് സുപ്രീം കോടതി മാര്ഗനിര്ദേശം. പ്രതികളുടെ ശിക്ഷ ജീവപര്യന്തത്തില് നിന്ന് പരമാവധി ശിക്ഷയായ വധശിക്ഷയായി ഉയര്ത്താന് സാഹചര്യം ഉണ്ടോയെന്നും കോടതി ചോദിച്ചു. പ്രതികളുടെ ശിക്ഷ വര്ധിപ്പിക്കണമെന്ന പ്രോസിക്യൂഷന് വാദം കേള്ക്കുന്നതിനിടെയാണ് ഹൈക്കോടതി ഈ ചോദ്യങ്ങള് ഉന്നയിച്ചത്. എല്ലാ തെളിവുകളും കോടതി പരിശോധിച്ചതാണെന്നും പെട്ടെന്നുള്ള വികാരത്തിന് പുറത്ത് നടന്ന കൊലപാതകം അല്ല ടി പി ചന്ദ്രശേഖരന്റേത് മറിച്ച് കൊലപാതകം ആസൂത്രണം ചെയ്തു നടപ്പാക്കിയതാണെന്നും പ്രോസിക്യൂഷന് വാദിച്ചു. ഒരാളുടെ മാത്രം ബുദ്ധിയില് ആലോചിച്ചു നടത്തിയ കൊലപാതകം അല്ല ഇതെന്നും പ്രോസിക്യൂഷന് വാദിച്ചു.
