കൊച്ചി - നടിയെ ആക്രമിച്ച കേസില് മെമ്മറി കാര്ഡ് നിയമ വിരുദ്ധമായി പരിശോധിച്ച സംഭവത്തിലെ അന്വേഷണ റിപ്പോര്ട്ടിന്റെ പകര്പ്പ് അതിതീവിതയ്ക്ക് കൈമാറാന് ഹൈക്കോടതി ഉത്തരവിട്ടു. അതേസമയം അന്വേഷണ റിപ്പോര്ട്ടിന്റെ പകര്പ്പ് വേണമെന്ന പ്രതി ദിലീപിന്റെ ആവശ്യം കോടതി അംഗീകരിച്ചില്ല. റിപ്പോര്ട്ടിന്റെ പകര്പ്പ് നല്കണമെന്ന് ആവശ്യപ്പെട്ട് അതിജീവിത ഹൈക്കോടതിയെ സമീപിച്ചിരുന്നു.
കേസിലെ പ്രധാന തെളിവായ മെമ്മറി കാര്ഡ് കോടതിയുടെ കസ്റ്റഡിയിലിരിക്കെ, അനുമതിയില്ലാതെ പരിശോധിച്ചതില് ജില്ലാ സെഷന്സ് ജഡ്ജാണ് അന്വേഷണം നടത്തിയത്. തുടര്ന്ന് അന്വേഷണ റിപ്പോര്ട്ട് ഹൈക്കോടതിയില് സമര്പ്പിച്ചിരുന്നു. ഇതിന്റെ പകര്പ്പ് അതിജീവിതയ്ക്ക് നല്കിയിരുന്നില്ല. അത് നല്കാനാണ് ഇപ്പോള് കോടതി നിര്ദേശിച്ചിരിക്കുന്നത്. ജസ്റ്റിസ് കെ ബാബു അധ്യക്ഷനായ സിംഗിള് ബെഞ്ചാണ് ഹര്ജി പരിഗണിച്ചത്. അന്വേഷണ റിപ്പോര്ട്ടിന്റെ പകര്പ്പ് ആവശ്യപ്പെട്ടുവെങ്കിലും അതിജീവിതയുടെ ആവശ്യം എറണാകുളം സെഷന്സ് കോടതി നേരത്തെ തള്ളിയിരുന്നു. ഇതിന് പിന്നാലെയാണ് അതിജീവിത ഹൈക്കോടതിയെ സമീപിച്ചത്. കേസിലെ പ്രധാന തെളിവായ മെമ്മറി കാര്ഡ് വിചാരണ സമയത്തും അതിന് മുന്പും മൂന്ന് തവണ പരിശോധിക്കപ്പെട്ടിട്ടുണ്ടെന്നാണ് ഫോറന്സിക് റിപ്പോര്ട്ട്. ഇതിന്റെ അടിസ്ഥാനത്തിലാണ് ഇത് സംബന്ധിച്ച് അന്വേഷണം നടത്തണമന്നാവശ്യപ്പെട്ട് അതിജീവിത ഹൈക്കോടതിയെ സമീപിച്ചത്.
