ന്യൂദൽഹി- കോൺഗ്രസ് നേതാവും എം.പിയുമായ ശശി തരൂരിന് ഫ്രാൻസിന്റെ പരമോന്നത സിവിലിയൻ ബഹുമതിയായ 'ഷെവലിയർ ഡി ലാ ലെജിയൻ ഡി ഹോണർ' സമ്മാനിച്ചു. ന്യൂദൽഹിയിലെ ഫ്രഞ്ച് എംബസിയിൽ നടന്ന ചടങ്ങിൽ ഫ്രഞ്ച് സെനറ്റ് പ്രസിഡന്റ് ജെറാർഡ് ലാർച്ചറാണ് അവാർഡ് സമ്മാനിച്ചത്. മുൻ കേന്ദ്രമന്ത്രിയായിരുന്ന തരൂരിന് ഫ്രഞ്ച് സർക്കാർ 2022 ഓഗസ്റ്റിൽ അവാർഡ് പ്രഖ്യാപിച്ചിരുന്നുവെങ്കിലും ചൊവ്വാഴ്ചയാണ് അദ്ദേഹത്തിന് അവാർഡ് സമ്മാനിച്ചത്.
'ഇന്തോ-ഫ്രഞ്ച് ബന്ധം കൂടുതൽ ആഴത്തിലാക്കാനുള്ള ഡോ. തരൂരിന്റെ അശ്രാന്ത പരിശ്രമം, അന്താരാഷ്ട്ര സമാധാനത്തിനും സഹകരണത്തിനും വേണ്ടിയുള്ള പ്രതിബദ്ധത, ഫ്രാൻസിന്റെ ദീർഘകാല സുഹൃത്ത് എന്നിവയ്ക്കുള്ള അംഗീകാരമാണ് പരമോന്നത ഫ്രഞ്ച് സിവിലിയൻ അവാർഡെന്ന് ഫ്രഞ്ച് എംബസി പുറത്തിറക്കിയ പ്രസ്താവനയിൽ പറഞ്ഞു.
നയതന്ത്രജ്ഞൻ, എഴുത്തുകാരൻ, രാഷ്ട്രീയക്കാരൻ എന്നീ നിലയിലുള്ള തന്റെ മികച്ച ജീവിതത്തിലൂടെ, അറിവിനായുള്ള ദാഹവും ബുദ്ധിശക്തിയും കൊണ്ട് ശശി തരൂർ ലോകത്തെ ആശ്ലേഷിച്ചുവെന്ന് ഫ്രഞ്ച് സെനറ്റ് ചെയർമാൻ ലാർച്ചർ പറഞ്ഞു. തരൂർ ഫ്രാൻസിന്റെ യഥാർത്ഥ സുഹൃത്ത് കൂടിയാണ്. ഫ്രാൻസിനെക്കുറിച്ചും അതിന്റെ സംസ്‌കാരത്തെക്കുറിച്ചും ആഴത്തിലുള്ള ധാരണ അദ്ദേഹത്തിനുണ്ട്. അവാർഡിലൂടെ, തരൂരിന്റെ നേട്ടങ്ങളെയും സൗഹൃദത്തെയും ഫ്രാൻസിനോടുള്ള സ്‌നേഹത്തെയും ഫ്രഞ്ച് റിപ്പബ്ലിക്ക് അംഗീകരിക്കുന്നുവെന്നും ലാർച്ചർ പറഞ്ഞു.
ഷെവലിയർ ഡി ലാ ലെജിയൻ ഡി ഹോണർ (നൈറ്റ് ഓഫ് ദി ലീജിയൻ ഓഫ് ഓണർ) സ്വീകരിക്കുന്നതിൽ തനിക്ക് വലിയ അഭിമാനമുണ്ടെന്ന് തരൂർ പറഞ്ഞു. ഫ്രാൻസിനെയും അവിടുത്തെ ജനങ്ങളെയും അവരുടെ സംസ്‌കാരത്തെയും ഭാഷയെയും സാഹിത്യത്തെയും സിനിമയെയും അഭിനന്ദിക്കുന്ന ഒരാളെന്ന നിലയിൽ, നിങ്ങളുടെ രാജ്യത്തിന്റെ പരമോന്നത സിവിലിയൻ ബഹുമതി ലഭിക്കുന്നതിൽ ഞാൻ അങ്ങേയറ്റം വിനീതനാണ്. ഒരു ഇന്ത്യക്കാരന് ഈ അവാർഡ് ലഭിച്ചത് ഫ്രാങ്കോ-ഇന്ത്യൻ ബന്ധത്തിന്റെ ആഴത്തിലുള്ള ബന്ധത്തിനുള്ള അംഗീകാരമാണെന്നും തരൂർ പറഞ്ഞു.
1802ൽ നെപ്പോളിയൻ ബോണപാർട്ട് സ്ഥാപിച്ച ലെജിയൻ ഡി ഹോണർ ഫ്രഞ്ച് റിപ്പബ്ലിക്ക് നൽകുന്ന ഏറ്റവും ഉയർന്ന സിവിലിയൻ അവാർഡാണിത്.
