ന്യൂദല്ഹി - കടമെടുപ്പ് പരിധി കേന്ദ്ര സര്ക്കാര് വെട്ടിക്കുറച്ചതുമായി ബന്ധപ്പെട്ട് സംസ്ഥാന സര്ക്കാര് നല്കിയ ഹര്ജിയില് സുപ്രധാന നിര്ദ്ദേശവുമായി സുപ്രീം കോടതി. കടമെടുപ്പ് പരിധി സംബന്ധിച്ച് കേന്ദ്രവും കേരളവും തമ്മില് ആദ്യം ചര്ച്ച നടത്തണമെന്ന് സുപ്രീംകോടതി നിര്ദ്ദേശിച്ചു. സൗഹാര്ദ്ദപരമായ സമീപനം ഉണ്ടായിക്കൂടേയെന്ന് കോടതി ചോദിച്ചു. ചര്ച്ചക്ക് തയാറെന്നും കേരളവും കേന്ദ്രവും കോടതിയെ അറിയിച്ചു. ഇതോടെ കേരള ധനമന്ത്രിയും കേന്ദ്ര ധനകാര്യ സെക്രട്ടറിയും ചര്ച്ച നടത്തട്ടേയെന്നും സുപ്രീംകോടതി നിര്ദ്ദേശിച്ചു. ചര്ച്ചകള്ക്ക് കോടതി മധ്യസ്ഥത വഹിക്കുന്നത് അവസാനം മതിയെന്നും ഇന്ന് ഉച്ചക്ക് രണ്ടു മണിക്ക് രണ്ട് വിഭാഗവും നിലപാട് അറിയിക്കണമെന്നും സുപ്രീംകോടതി പറഞ്ഞു.
