കയ്‌റോ - അയല്‍വാസിയുടെ മകളെ ബലാത്സംഗം ചെയ്തു കൊന്ന സംഭവം ഈജിപ്തില്‍ വന്‍ ജനരോഷത്തിനിടയാക്കി. കുട്ടിയെ കാണാതായതിനെ തുടര്‍ന്ന് നടത്തിയ അന്വേഷണങ്ങള്‍ക്കും തിരച്ചിലിനുമൊടുവില്‍ പെണ്‍കുട്ടി തൊട്ടടുത്ത ഗ്രോസറിയിലെത്തി സ്‌നാക്‌സ് വാങ്ങിയ ശേഷം വീടിന്റെ ചുറ്റുമതിലിനോടടുത്തുള്ള വീട്ടിലേക്കു പോകുന്നത് സെക്യൂരിറ്റി ക്യാമറ ദൃശ്യങ്ങളില്‍ കണ്ടെത്തുകയായിരുന്നു. അയല്‍വാസിയെ കസ്റ്റഡിയിലെടുത്ത് ചോദ്യം ചെയ്തതോടെയാണ് ക്രൂര കൃത്യത്തിനെ കുറിച്ച് പുറംലോകമറിയുന്നത്. തന്റെ വീട്ടിലെ കൂട്ടികളോടൊത്ത് കളിക്കാനെത്തിയ ബാലികയെ അവര്‍ ഉറക്കത്തിലാണെന്ന് വിശ്വസിപ്പിച്ച പ്രതി തന്ത്രപരമായി കീഴടക്കി ബലാത്സംഗം ചെയ്യുകയായിരുന്നു. വീടിനകത്ത് കുഴിയെടുത്ത് കുട്ടിയുടെ ജഡം കുഴിച്ചിടുകയും ചെയ്തു. വിചാരണ നടപടികള്‍ പൂര്‍ത്തിയാക്കി ശക്തമായ ശിക്ഷ നല്‍കാന്‍ പ്രതിയെ ബന്ധപ്പെട്ട വകുപ്പുകള്‍ക്ക് കൈമാറി.
