കാസര്കോട് - ബന്ധത്തില് നിന്ന് പിന്മാറിയാല് പിതാവിനെ കൊലപ്പെടുത്തുമെന്ന് യുവാവിന്റെ ഭീഷണിയെ തുടര്ന്ന് ആത്മഹത്യക്ക് ശ്രമിച്ച 15 കാരി മരിച്ചു. സംഭവത്തില് മൊഗ്രാല് സ്വദേശി അന്വറിനെ പൊലീസ് അറസ്റ്റ് ചെയ്തു. ഇന്സ്റ്റഗ്രാമിലൂടെ പരിചയപ്പെട്ട പെണ്കുട്ടി അന്വറില് നിന്ന് അകലാന് ശ്രമിച്ചപ്പോള്, ബന്ധമുപേക്ഷിച്ചാല് പിതാവിനെ കൊലപ്പെടുത്തുമെന്ന് ഇയാള് ഭീഷണിപ്പെടുത്തുകയായിരുന്നു. ഇതേ തുടര്ന്നുള്ള മനോവിഷമത്തില്
വിഷം കഴിച്ച പെണ്കുട്ടിയെ മംഗലാപുരത്തും ബെംഗളൂരുവിലും ചികിത്സയ്ക്കായി പ്രവേശിപ്പിച്ചെങ്കിലും ജീവന് രക്ഷിക്കാനായില്ല. അഞ്ച് ദിവസം പെണ്കുട്ടി ചികിത്സയിലായിരുന്നു. ഇതുമായി ബന്ധപ്പെട്ട് നേരത്തെ തന്നെ യുവാവിനെതിരെ കുട്ടിയുടെ ബന്ധുക്കള് ബദിയടുക്ക പോലീസിന് പരാതി നല്കിയിരുന്നു.
