തിരുവനന്തപുരം- തിരുവനന്തപുരം മുനിസിപ്പല് കോര്പ്പറേഷനിലെ വെള്ളാര് വാര്ഡ് ഉള്പ്പെടെ സംസ്ഥാനത്തെ 23 തദ്ദേശ സ്വയംഭരണ വാര്ഡുകളില് ഫെബ്രുവരി 22 ന് ഉപതെരഞ്ഞെടുപ്പ് നടത്തുമെന്ന് സംസ്ഥാന തെരഞ്ഞെടുപ്പ് കമ്മീഷണര് എ ഷാജഹാന് അറിയിച്ചു. വിജ്ഞാപനം തിങ്കളാഴ്ച പുറപ്പെടുവിക്കും. നാമനിര്ദ്ദേശ പത്രിക ഫെബ്രുവരി അഞ്ച് വരെ സമര്പ്പിക്കാം. സൂക്ഷ്മ പരിശോധന ഫെബ്രുവരി ആറിന് വിവിധ കേന്ദ്രങ്ങളില് നടത്തും. പത്രിക ഫെബ്രുവരി എട്ട് വരെ പിന്വലിക്കാം. വോട്ടെണ്ണല് ഫെബ്രുവരി 23 ന് രാവിലെ 10 മണിക്ക് നടത്തും.
മാതൃകാ പെരുമാറ്റച്ചട്ടം നിലവില് ഉപതെരഞ്ഞെടുപ്പുള്ള ഗ്രാമപഞ്ചായത്തുകളില് മുഴുവന് വാര്ഡുകളിലും, കോര്പ്പറേഷന്, മുനിസിപ്പാലിറ്റികളില് അതത് വാര്ഡുകളിലുമാണ് ബാധകമാവുക. നാമനിര്ദ്ദേശ പത്രികയ്ക്കൊപ്പം കെട്ടിവയ്യേണ്ട തുക മുനിസിപ്പല് കോര്പ്പറേഷനില് 5000 രൂപയും മുനിസിപ്പാലിറ്റികളില് 4000 രൂപയും ഗ്രാമപഞ്ചായത്തുകളില് 2000 രൂപയുമാണ്. പട്ടികജാതി, പട്ടികവര്ഗ വിഭാഗങ്ങള്ക്ക് ഇതിന്റെ പകുതി തുക അടച്ചാല് മതി.
അര്ഹതയുള്ള സ്ഥാനാര്ത്ഥികള്ക്ക് നിക്ഷേപത്തുക കാലതാമസം കൂടാതെ തിരികെ ലഭിക്കുന്നതിന് പത്രികയോടൊപ്പം നിശ്ചിത ഫാറത്തില് ബാങ്ക് അക്കൗണ്ട് വിവരങ്ങള് കൂടി നല്കണം. തിരഞ്ഞെടുപ്പിനു വേണ്ടി അന്തിമ വോട്ടര്പട്ടിക ജനുവരി 25 ന് പ്രസിദ്ധീകരിച്ചു. 23 വാര്ഡുകളിലായി ആകെ 32512 വോട്ടര്മാരുണ്ട്. അതില് 15298 പുരുഷന്മാരും 17214 പേര് സ്ത്രീകളുമാണ്. വെബ്സൈറ്റിലും തദ്ദേശസ്ഥാപനങ്ങളിലും വോട്ടര് പട്ടിക ലഭ്യമാണ്.
പത്ത് ജില്ലകളിലായി ഒരു കോര്പ്പറേഷന് വാര്ഡിലും നാല് മുനിസിപ്പാലിറ്റി വാര്ഡുകളിലും 18 ഗ്രാമപഞ്ചായത്ത് വാര്ഡുകളിലുമാണ് ഉപതെിരഞ്ഞെടുപ്പ് നടത്തുന്നത്.
