പുല്‍പ്പള്ളി - മാവോയിസ്റ്റ് വേട്ടക്കായുള്ള തണ്ടര്‍ ബോള്‍ട്ട് സംഘവും മാവോയിസ്റ്റുകളുമായുള്ള ഏറ്റമുട്ടലില്‍ വനിതാ മാവോയ്‌സ്റ്റ് കൊല്ലപ്പെട്ടതായി പോസ്റ്റര്‍. മാവോയിസ്റ്റുകള്‍ തന്നെയാണ് ഇത് സംബന്ധിച്ച് പോസ്റ്റര്‍ പതിച്ചിട്ടുള്ളത്. കണ്ണൂര്‍ അയ്യന്‍കുന്ന് ഞെട്ടിത്തോട്ടില്‍ തണ്ടര്‍ബോള്‍ട്ട് സംഘവും മാവോയിസ്റ്റുകളും തമ്മില്‍ കഴിഞ്ഞ നവംബര്‍ 13ന് രാവിലെ 9:50 ന് ഏറ്റുമുട്ടല്‍ ഉണ്ടായെന്നും കവിത (ലക്ഷ്മി) എന്ന മാവോയിസ്റ്റാണ് കൊല്ലപ്പെട്ടതെന്നും തിരുനെല്ലിയില്‍ പതിച്ച പോസ്റ്ററില്‍ മാവോയിസ്റ്റുകള്‍ പറയുന്നു. പശ്ചിമഘട്ട പ്രത്യേക മേഖലാ കമ്മറ്റിയുടെ പേരിലാണ് പോസ്റ്റര്‍ പതിച്ചിരിക്കുന്നത്. ആറളത്ത് കവിത കൊല്ലപ്പെട്ടതിന് പകരം വീട്ടുമെന്നും പോസ്റ്ററില്‍ വ്യക്തമാക്കുന്നു. തിരുനെല്ലിയിലെ ഗുണ്ടിക പറമ്പ് കോളനിയിലാണ് പോസ്റ്റര്‍ പതിച്ചത്. ഇന്നലെ രാത്രി വൈകി ആറ് പേരുടെ സംഘമാണ് ഗുണ്ടിക പറമ്പ് കോളനിയില്‍ എത്തിയത്. ഞെട്ടിത്തോട് നടന്ന ഏറ്റുമുട്ടലില്‍ ചിലര്‍ക്ക് പരിക്കേറ്റിരുന്നുവെന്ന് അന്ന് തന്നെ ഡി ഐ ജി പുട്ട വിമലാദിത്യ വ്യക്തമാക്കിയിരുന്നു. എന്നാല്‍ മാവോയിസ്റ്റുകളില്‍ ആരെങ്കിലും കൊല്ലപ്പെട്ടത് സംബന്ധിച്ച് പോലീസിന് ഇത് വരെ വിവരം ലഭിച്ചിട്ടില്ല.
