കൊല്ലം- പുനലൂരിലെ നവകേരള സദസില്‍ മുഖ്യമന്ത്രി പ്രസംഗിക്കുന്നതിനിടെ പ്രതിഷേധവുമായി ഒരാള്‍ വേദിയിലേക്ക് പാഞ്ഞടുത്തു. പോലീസ് ഇയാളെ കസ്റ്റഡിയിലെടുത്തു. പല രൂപത്തിലും നവകേരള സദസിനെ അലങ്കോലപ്പെടുത്താന്‍ ശ്രമം നടക്കുന്നതായി മുഖ്യമന്ത്രി പറഞ്ഞു. ഇതുപോലെ എത്ര പ്രതിഷേധം കണ്ടതാണ് താനെന്നും മുഖ്യമന്ത്രി പറഞ്ഞു. ശാസ്താംകോട്ട ഭരണിക്കാവില്‍ നവകേരള ബസിനെതിരെ യൂത്ത് കോണ്‍ഗ്രസ്-കെഎസ്യു പ്രവര്‍ത്തകര്‍ പ്രതിഷേധിച്ചു. മുഖ്യമന്ത്രിയുടെ വാഹനത്തിന് നേരെ കരിങ്കൊടി കാണിച്ച പ്രവര്‍ത്തകരെ പോലീസ് അറസ്റ്റ് ചെയ്ത് നീക്കി. യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി പവിജ പത്മന്‍ അടക്കമുള്ളവരെ പൊലീസ് അറസ്റ്റ് ചെയ്തു. പ്രവര്‍ത്തകരെ ശാസ്താംകോട്ട പൊലീസ് സ്റ്റേഷനിലേക്ക് മാറ്റി.
