ന്യൂദൽഹി- കഴിഞ്ഞയാഴ്ച പാർലമെന്റിലുണ്ടായ വൻ സുരക്ഷാവീഴ്ച സംബന്ധിച്ച് കേന്ദ്ര ആഭ്യന്തരമന്ത്രി അമിത് ഷാ സഭയിൽ വിശദീകരിക്കണമെന്ന് ആവശ്യപ്പെട്ട് ചേംബറിൽ പ്രതിഷേധിച്ചതിന് 30 പ്രതിപക്ഷ എം.പിമാരെ പാർലമെന്റിന്റെ ശീതകാല സമ്മേളനത്തിന്റെ ബാക്കി ഭാഗത്തേക്ക് ലോക്‌സഭയിൽ നിന്ന് സസ്‌പെൻഡ് ചെയ്തു. ആഭ്യന്തരമന്ത്രിയുടെ പ്രസ്താവന ആവശ്യപ്പെട്ട് 13 പ്രതിപക്ഷ എം.പിമാർ കഴിഞ്ഞയാഴ്ച നടപടി നേരിട്ടതിന് പിന്നാലെയാണ് പുതിയ സസ്‌പെൻഷൻ.
സ്പീക്കറുടെ പോഡിയത്തിൽ കയറി മുദ്രാവാക്യം വിളിച്ചതിന് മറ്റ് മൂന്ന് എം.പിമാരെയും പ്രിവിലേജസ് കമ്മിറ്റി റിപ്പോർട്ട് വരുന്നത് വരെ സസ്‌പെൻഡ് ചെയ്തു. ഇതോടെ മൊത്തം 46 ലോക്‌സഭാ എംപിമാരെ സസ്‌പെന്റ് ചെയ്തു. സുരക്ഷാ വീഴ്ച ചർച്ച ചെയ്യണമെന്ന് ആവശ്യപ്പെട്ടതിന് രാജ്യസഭാ എം.പി ഡെറക് ഒബ്രിയനെ കഴിഞ്ഞയാഴ്ച സസ്‌പെൻഡ് ചെയ്തിരുന്നു.
ലോക്‌സഭയിലെ കോൺഗ്രസ് നേതാവ് അധീർ രഞ്ജൻ ചൗധരി, സഭയിലെ പാർട്ടി ഉപനേതാവ് ഗൗരവ് ഗൊഗോയ് എന്നിവരും സസ്‌പെൻഡ് ചെയ്യപ്പെട്ട എം.പിമാരിൽ ഉൾപ്പെടുന്നു. തൃണമൂൽ എം.പിമാരായ കല്യാണ് ബാനർജി, കക്കോലി ഘോഷ് ദസ്തിദാർ, സൗഗത റേ, സതാബ്ദി റോയ്, ഡി.എം.കെ അംഗങ്ങളായ എ. രാജ, ദയാനിധി മാരൻ എന്നിവരും പട്ടികയിലുണ്ട്.
സർക്കാർ ഏകാധിപത്യപരമായാണ് പെരുമാറുന്നതെന്നും പാർലമെന്റിനെ ബി.ജെ.പി ആസ്ഥാനമായാണ് കണക്കാക്കുന്നതെന്നും ചൗധരി മാധ്യമങ്ങളോട് പറഞ്ഞു. സമ്മേളനം ആരംഭിച്ചത് മുതൽ പ്രതിപക്ഷം സർക്കാരുമായി സഹകരിക്കുന്നുണ്ടെന്നും അദ്ദേഹം പറഞ്ഞു.
'ഈ സർക്കാർ സ്വേച്ഛാധിപത്യത്തിന്റെ പരകോടിയിൽ എത്തിയിരിക്കുന്നു. അവർക്ക് ഭൂരിപക്ഷമുണ്ട്, അവർ അധികാരത്തിന്റെ വടി ചലിപ്പിക്കുന്നു. പാർലമെന്റ് ഒരു പാർട്ടി ഓഫീസ് പോലെ നയിക്കാൻ അവർ ആഗ്രഹിക്കുന്നു. പക്ഷേ അത് നടക്കില്ല. മാധ്യമങ്ങളോട് സംസാരിക്കുന്നത് അവർക്ക് എളുപ്പമാണെന്ന് തോന്നുന്നു. പക്ഷേ പാർലമെന്റിൽ സംസാരിക്കാൻ ഭയപ്പെടുന്നു,' അദ്ദേഹം പറഞ്ഞു.
ബി.ജെ.പി സർക്കാർ പ്രതിപക്ഷത്തെ ബുൾഡോസർ ചെയ്യുകയാണെന്നും വൻ സുരക്ഷാ വീഴ്ചയുടെ ഉത്തരവാദിത്തം ഏറ്റെടുക്കാൻ ആഭ്യന്തരമന്ത്രി ഭയപ്പെടുന്നുവെന്നും ഗോഗോയ് പറഞ്ഞു. ലോക്‌സഭയ്ക്ക് പുറത്ത് പ്രതിഷേധം തുടരുമെന്നും അദ്ദേഹം പറഞ്ഞു. പ്രതിപക്ഷമില്ലാത്ത പാർലമെന്റിലൂടെ സർക്കാരിന് ഇപ്പോൾ പ്രധാനപ്പെട്ട നിയമനിർമ്മാണങ്ങൾ ബുൾഡോസ് ചെയ്യാനാകുമെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ പറഞ്ഞു.
