കൊച്ചി- ആരാധകർ എല്ലാ സമയത്തും മോഹൻ ലാലിനോട് ചോദിക്കുന്ന ചോദ്യമാണ് എന്നാണ് താടിയെടുക്കുന്നതെന്ന്. ഒടിയൻ എന്ന ചിത്രത്തിന് ശേഷം മോഹൻലാൽ താടി എടുത്തിട്ടേയില്ല. എന്താണ് താടിയെടുക്കാത്തത് എന്ന ചോദ്യത്തിന് മറുപടി നൽകിയിരിക്കുകയാണ് താരം. പുതിയ ചിത്രമായി നേരിന്റെ പ്രൊമേഷനിടെയാണ് ലാൽ ഇക്കാര്യം പറഞ്ഞത്. സിനിമകളുടെ കണ്ടിന്യൂവിറ്റിക്ക് വേണ്ടിയാണ് താടി നിലനിർത്തുന്നത് എന്നാണ് ലാൽ പറഞ്ഞത്. റാം, എമ്പുരാൻ എന്നീ സിനിമകളുടെ കണ്ടിന്യൂവിറ്റിക്ക് വേണ്ടിയാണ് താടിയെടുക്കാത്തതെന്നും ലാൽ വ്യക്തമാക്കി.
താടി മാറ്റി മീശ പിരിക്കുന്ന ഒരു ലാലേട്ടനെ എന്ന് കാണാൻ പറ്റുമെന്ന അവതാരകന്റെ ചോദ്യത്തിന് ജീത്തു ജോസഫിനെ ചൂണ്ടി ഇവരോട് വേഗം ഷൂട്ട് ചെയ്യാൻ പറ എന്ന് മോഹൻ ലാൽ പറഞ്ഞു. പിന്നെ ഇത് വളരുന്നതാണ്. ഷേവ് ചെയ്താൽ വീണ്ടും വളരുമെന്നും മോഹൻ ലാൽ പറഞ്ഞു. താൻ ചിലപ്പോൾ ആത്മീയതയിലേക്ക് പോയേക്കാമെന്ന് മോഹൻലാൽ പറയുന്നുണ്ട്. ആത്മീയത തനിക്ക് ഇപ്പോൾ വന്നതല്ലെന്നും വളരെ കുഞ്ഞു നാളുമുതൽ തനിക്ക് ആത്മീയതയെക്കുറിച്ചുള്ള ചിന്താഗതിയുള്ള സുഹൃത്തുക്കൾ ഉണ്ടെന്നും മോഹൻ ലാൽ പറഞ്ഞു. ആത്മീതയുമായി ബന്ധമുള്ള കാര്യങ്ങളിൽ തനിക്ക് താല്പര്യമുണ്ട്. കുറച്ച് നാൾ കഴിഞ്ഞ് തന്റെ ജീവിതം ആത്മീയതയ്ക്ക് വേണ്ടി മാറ്റിവെക്കുമോ എന്ന് അറിയില്ല. എന്റെ ഒരുപാട് സുഹൃത്തുക്കൾ ആത്മീയമായി ചിന്തിക്കുന്നവരാണ്. എല്ലാ രീതിയിലും ചിന്തിക്കുന്ന ഒരുപാട് സുഹൃത്തുക്കളുണ്ട് എന്നും ലാൽ പറയുന്നു.
