വാഷിംഗ്ടണ്‍- ഗാസയിലെ നിലക്കാത്ത ബോംബാക്രമണം ഇസ്രായിലിന് രാജ്യാന്തര സമൂഹത്തിന്റെ പിന്തുണ നഷ്ടപ്പെടുത്തിയതായി യു.എസ് പ്രസിഡന്റ് ജോ ബൈഡന്‍. ഗാസ യുദ്ധം തുടങ്ങിയ ശേഷം ഇതാദ്യമായാണ് അമേരിക്ക ഇസ്രായിലിന് മുന്നറിയിപ്പ് നല്‍കുന്ന ഭാഷയില്‍ സംസാരിക്കുന്നത്. അമേരിക്കയുടെ സ്വരംമാറ്റത്തിന്റെ സൂചനയാണിതെന്ന് വിലയിരുത്തപ്പെടുന്നു.
വാഷിംഗ്ടണില്‍ ഫണ്ട് ശേഖരണ ക്യാംപെയ്‌നില്‍ സംസാരിക്കവേയാണ് ബൈഡന്‍ ഇങ്ങനെ പറഞ്ഞത്. അവര്‍ക്ക് പിന്തുണ നഷ്ടമായിത്തുടങ്ങിയിരിക്കുന്നു- അദ്ദേഹം പറഞ്ഞു. തന്റെ തീവ്ര ചിന്താഗതിയുള്ള സര്‍ക്കാരില്‍ ഇസ്രായില്‍ പ്രധാനമന്ത്രി ബെഞ്ചമിന്‍ നെതന്യാഹു മാറ്റം വരുത്തേണ്ടിയിരിക്കുന്നുവെന്നും ബൈഡന്‍ പറഞ്ഞു.
ഗാസയിലെ യുദ്ധം അവസാനിപ്പിക്കാന്‍ സ്വന്തം പാര്‍ട്ടിയില്‍ നിന്നും അനുയായികളുടെ അടിത്തട്ടില്‍ നിന്നും വര്‍ധിച്ചുവരുന്ന സമ്മര്‍ദത്തിനിടയില്‍, ജോ ബൈഡന്‍ ഫലസ്തീന്‍ യുദ്ധത്തില്‍ തന്റെ സ്വരം മാറ്റുന്നതായി നിരീക്ഷകര്ർ പറയുന്നു,
സംഘര്‍ഷത്തിന്റെ തുടക്കത്തില്‍, കുതിച്ചുയരുന്ന ഫലസ്തീനികളുടെ മരണസംഖ്യ തള്ളിക്കളയുകയും ചോദ്യം ചെയ്യുകയും ചെയ്യുകയായിരുന്നു യു.എസ് പ്രസിഡന്റ്.
'എത്ര പേര്‍ കൊല്ലപ്പെട്ടുവെന്ന കാര്യത്തില്‍ ഫലസ്തീനികള്‍ സത്യം പറയുന്നുണ്ടെന്ന് എനിക്ക് യാതൊരു ധാരണയുമില്ല. നിരപരാധികള്‍ കൊല്ലപ്പെട്ടിട്ടുണ്ടെന്ന് എനിക്ക് ഉറപ്പുണ്ട്, ഇത് ഒരു യുദ്ധത്തിന്റെ വിലയാണ്, ബൈഡന്‍ ഒക്ടോബര്‍ 25 ന് പറഞ്ഞു.
ഗാസയില്‍ കൊല്ലപ്പെട്ട ആളുകളുടെ എണ്ണത്തെക്കുറിച്ചുള്ള ഫലസ്തീന്‍ ആരോഗ്യ മന്ത്രാലയത്തിന്റെ ഡാറ്റ വലിയ തോതില്‍ വിശ്വസനീയമാണെന്ന് അദ്ദേഹത്തിന്റെ സ്വന്തം ഭരണകൂടത്തിലെ അംഗങ്ങള്‍ പിന്നീട് അംഗീകരിച്ചു.
ചൊവ്വാഴ്ച, ഇസ്രായിലിന്റെ നിരന്തരമായ ബോംബാക്രമണത്തെ ബൈഡന്‍ വിമര്‍ശിച്ചു. 'അവര്‍ക്ക് ആ പിന്തുണ നഷ്ടപ്പെടാന്‍ തുടങ്ങിയിരിക്കുന്നു- അദ്ദേഹം പറഞ്ഞതായി റോയിട്ടേഴ്‌സ് റിപ്പോര്‍ട്ട് ചെയ്തു.
ഒരു ദിവസം മുമ്പ്, വൈറ്റ് ഹൗസ് അവധിക്കാല റിസപ്ഷനിലും അദ്ദേഹം സമാനമായ പരാമര്‍ശങ്ങള്‍ നടത്തിയിരുന്നു.
ഹമാസിനെ തുരത്തുന്നത് വരെ ഞങ്ങള്‍ സൈനിക പിന്തുണ നല്‍കുന്നത് തുടരുമെന്നും അദ്ദേഹം പറഞ്ഞു. 'എന്നാല്‍ നമ്മള്‍ ശ്രദ്ധിക്കണം. അവര്‍ ജാഗ്രത പാലിക്കണം. ലോകത്തിന്റെ മുഴുവന്‍ പൊതുജനാഭിപ്രായവും ഒറ്റരാത്രികൊണ്ട് മാറാം. അത് സംഭവിക്കാന്‍ ഞങ്ങള്‍ അനുവദിക്കില്ല. '
കഴിഞ്ഞ ദിവസം ബൈഡന്‍ ഇസ്രായിലിന് 14 ബില്യണ്‍ ഡോളറിന്റെ സൈനിക സഹായ പാക്കേജ് നല്‍കുകയും വെടിനിര്‍ത്തലിനായുള്ള ആവശ്യങ്ങളെ എതിര്‍ക്കുകയും ചെയ്തു.
