ടൊറന്റോ- 220 ടണ്‍ ഭാരമുള്ള ഒരു കെട്ടിടം മറ്റൊരു സ്ഥലത്തേയ്ക്ക് മാറ്റി സ്ഥാപിച്ചത് 700 സോപ്പ് ബാറുകള്‍ ഉപയോഗിച്ച്. കാനഡ നോവ സ്‌കോട്ടിയയിലെ ഹാലിഫാക്സിലുള്ള പഴയ ഹോട്ടലാണ് പൊളിച്ചുമാറ്റാതെ മാറ്റി സ്ഥാപിച്ചത്. വിക്ടോറിയ രാജ്ഞിയുടെ കാലഘട്ടത്തെ കെട്ടിടമായ എലംവുഡ് ഹോട്ടലാണ് പാരമ്പര്യേതര മാര്‍ഗങ്ങള്‍ ഉപയോഗിച്ച് പുനഃസ്ഥാപിച്ചത്. 1826ലാണ് കെട്ടിടം പണിതത്. പിന്നീടിത് വിക്ടോറിയന്‍ എലംവുഡ് ഹോട്ടലാക്കി മാറ്റുകയായിരുന്നു. 2018ലാണ് കെട്ടിടത്തില്‍ ആദ്യമായി വിള്ളലുകള്‍ കണ്ടു തുടങ്ങിയത്. പിന്നാലെ ഗാലക്സി പ്രോപ്പര്‍ട്ടീസ് എന്നൊരു കമ്പനി പുരാതനമായ കെട്ടിടം സ്വന്തമാക്കുകയായിരുന്നു. കെട്ടിടം മറ്റൊരു സ്ഥലത്തേയ്ക്ക് മാറ്റി സ്ഥാപിക്കുക എന്ന ലക്ഷ്യത്തോടെയായിരുന്നു ഇത്. 220 ടണ്‍ ഭാരമുള്ള കെട്ടിടം മാറ്റി സ്ഥാപിക്കാനുള്ള വെല്ലുവിളി എസ് റുഷ്ടണ്‍ കണ്‍സ്ട്രക്ഷന്‍ ഏറ്റെടുക്കുകയായിരുന്നു. ഇതിന്റെ ദൃശ്യങ്ങള്‍ അവര്‍ സമൂഹമാദ്ധ്യമത്തില്‍ പങ്കുവച്ചിട്ടുണ്ട്. പരമ്പരാഗതമായ റോളറുകള്‍ ഉപയോഗിക്കാതെ വ്യത്യസ്തമായ രീതിയില്‍ കെട്ടിടം പുനഃസ്ഥാപിക്കാനാണ് കമ്പനി തീരുമാനിീച്ചത്. ഐവറി സോപ്പ് കൊണ്ടുണ്ടാക്കിയ സോപ്പ് കട്ടകളാണ് ഇതിനായി ഉപയോഗിച്ചത്. രണ്ട് എസ്‌കവേറ്ററുകളും ഒരു ട്രക്കും ഉപയോഗിച്ച് സോപ്പ് കട്ടകളുടെ സഹായത്തോടെ കെട്ടിടം നിരക്കി മാറ്റുകയാണ് ചെയ്തത്. 30 അടിയോളമാണ് കെട്ടിടം ഇത്തരത്തില്‍ നിരക്കി മാറ്റിയത്. ഈ വിദ്യ അധികൃതര്‍ക്ക് വേണമെങ്കില്‍ കേരളത്തില്‍ കോഴിക്കോട്ടും പരീക്ഷിക്കാവുന്നതാണ്. നഗരത്തില്‍ 128 കോടി ചെലവില്‍ നിര്‍മിച്ച കെ.എസ്ആര്‍ടിസിയുടെ ബഹു നില മന്ദിരമുണ്ട്. കൂരിരുള്‍ മൂടിയ ഇത് സുരക്ഷിതമല്ലെന്ന് ചെന്നൈ ഐഐടി റിപ്പോര്‍ട്ട് നല്‍കിയിട്ടുണ്ട്. ഈ കെട്ടിടത്തിന് ഫയര്‍-സേഫ്റ്റ് സര്‍ട്ടിഫിക്കറ്റുകളില്ലെന്നാണ് ശ്രുതി. മാവൂര്‍ റോഡിലെ കണ്ണായ സ്ഥലം പാഴാക്കിയ ഇതിനെ എടുത്തു മാറ്റി മ്യൂസിയത്തിലോ, ബീച്ചിലോ കൊണ്ടു വെച്ച് വെളിച്ചം കടക്കുന്ന വിധത്തില്‍ പുതിയ ചെറിയ കെട്ടിടം പണിയാവുന്നതേയുള്ളു.
