ലഖ്നൗ-ലോകത്തിലെ ഏറ്റവും നീളമുള്ള മുടിക്കുള്ള ഗിന്നസ് വേള്ഡ് റെക്കോര്ഡ് സ്വന്തമാക്കി ഇന്ത്യക്കാരി. ഉത്തര്പ്രദേശില് നിന്നുള്ള 46 കാരി സ്മിത ശ്രീവാസ്തവയുടെ മുടിക്ക് 7 അടി 9 ഇഞ്ച് നീളമുണ്ടെന്ന് ഗിന്നസ് വേള്ഡ് റെക്കോര്ഡ്സ് ഔദ്യോഗികമായി കണക്കാക്കി.
മുടിയോടുള്ള കൗതുകം കൊണ്ടും ഇഷ്ടം കൊണ്ടുമാണ് താന് മുടി നീട്ടി വളര്ത്തി തുടങ്ങിയതെങ്കിലും ഇപ്പോള് അത് ജീവിതത്തിലെ ഏറ്റവും വലിയ സമ്പാദ്യമായി മാറിയിരിക്കയാണെന്ന് സ്മിത പറയുന്നു. നീളമുള്ള മുടി ഇന്ത്യന് സംസ്കാരത്തിന്റെ ഭാഗമാണെന്നും പുരാണങ്ങളിലും മറ്റും പറഞ്ഞിട്ടുള്ള ദേവതകള്ക്കെല്ലാം നീളമുള്ള മുടി ഉണ്ടായിരുന്നുവെന്നും അവര് പറഞ്ഞു. മുടി ഇനിയും വളരണമെന്നാണ് ആഗ്രഹമെന്നും സ്മിത പറഞ്ഞു.
1980 കളില് ഹിന്ദി സിനിമകളിലെ നായികമാരുടെ നീണ്ട മുടിയില് നിന്നും പ്രചോദനം ഉള്ക്കൊണ്ടാണ് സ്മിത തന്റെ മുടി നീട്ടി വളര്ത്തി തുടങ്ങിയത്. ഗിന്നസ് വേള്ഡ് റെക്കോര്ഡ് പ്രകാരം, സ്മിത സാധാരണയായി ആഴ്ചയില് രണ്ട് തവണ മാത്രമാണ് മുടി കഴുകുന്നത്. കഴുകല്, ഉണക്കല്, സ്റ്റൈലിംഗ് എന്നിവ ഉള്പ്പെടെയുള്ള മുടിയുടെ പരിചരണത്തിനായി ഓരോ തവണയും മൂന്നു മണിക്കൂര് വരെയാണ് ഇവര് ചെലവഴിക്കാറ്.
