ഇംഫാല് - സംഘര്ഷത്തെ തുടര്ന്ന് കനത്ത സുരക്ഷ നിലനില്ക്കുന്ന മണിപ്പൂരിന്റെ തലസ്ഥാനമായ ഇംഫാലിലെ വിമാനത്താവളത്തിന് സമീപം അജ്ഞാത ഡ്രോണുകളുടെ സാന്നിധ്യം കണ്ടെത്തി. ഇതേതുടര്ന്ന് ഇംഫാലിലും പരിസരത്തുമുള്ള വ്യോമപാത അടച്ചു. പോലീസും എയര്പോര്ട്ട് അധികൃതരും ഇവിടെ കനത്ത കനത്ത ജാഗ്രത പാലിക്കുകയാണ്.ഞായറാഴ്ച ഉച്ചയ്ക്ക് 2:30 നാണ് അജ്ഞാത ഡ്രോണുകളുടെ സാന്നിധ്യം കണ്ടെത്തിയതെന്നാണ് വിവരം. സുരക്ഷാ ആശങ്ക മുന്നിര്ത്തിയാണ് വ്യോമപാത അടച്ചത്. വ്യോമപാത അടച്ചത്തോടെ വിമാന സര്വീസുകള് തടസ്സപ്പെട്ടു. ഇംഫാലിലേക്കും തിരിച്ചുമുള്ള ഏതാനും വിമാനങ്ങള് റദ്ദാക്കി. ഇവിടേക്ക് എത്തിയ ചില വിമാനങ്ങള് ഇംഫാല് വ്യോമാതിര്ത്തിയില് നിന്ന് തിരിച്ചുവിട്ടതായും അധികൃതര് അറിയിച്ചു.
