പാലക്കാട് - രാജ്യം പത്മശ്രീ നൽകി ആദരിച്ച കൂത്ത്, കൂടിയാട്ടം ആചാര്യൻ പി.കെ നാരായണൻ നമ്പ്യാർ (96) അന്തരിച്ചു. ദീർഘകാലം കേരള കലാമണ്ഡലത്തിൽ കൂടിയാട്ടം വിഭാഗത്തിൽ അധ്യാപകനായിരുന്നു. കേരള കലാമണ്ഡലത്തിൽ ഡീനായും സേവനമനുഷ്ഠിച്ചിട്ടുണ്ട്.
മിഴാവിൽ തായമ്പക, മിഴാവ് മേളം തുടങ്ങിയ ആവിഷ്‌കാരങ്ങൾ നടത്തിയിട്ടുണ്ട്. മന്ത്രാങ്കം, ശ്രീകൃഷ്ണചരിതം നങ്ങ്യാർക്കൂത്ത് തുടങ്ങിയ നിരവധി ഗ്രന്ഥങ്ങളുടെ രചയിതാവ് കൂടിയാണ്.
കൂടിയാട്ട കുലപതി മാണി മാധവ ചാക്യാരുടെ മൂത്ത പുത്രനായി, പാലക്കാട് കിള്ളിക്കുറിശ്ശിമംഗലത്താണ് നാരായണൻ നമ്പ്യാരുടെ ജനനം. മിഴാവ് വാദകനായി ജീവിതം ആരംഭിച്ച നമ്പ്യാർ കൂടിയാട്ടം, പാഠകം, കൂത്ത് എന്നിവയുടെ കുലപതിയായാണ് അറിയിപ്പെടുന്നത്. നിരവധി സംസ്‌കൃത നാടകങ്ങൾ എഴുതി ചിട്ടപ്പെടുത്തി. കൂടിയാട്ടത്തെ അമ്പല മതിൽകെട്ടിൽ നിന്നും പുറത്തേക്ക് കൊണ്ടുവരാൻ കഠിനമായി ശ്രമിച്ച പണ്ഡിത ശ്രേഷ്ഠൻ കൂടിയാണ് പത്മശ്രീ നാരായണൻ നമ്പ്യാർ.
