ഗാസ- ഫലസ്തീനിലെ ഗാസ മുനമ്പിൽ ഇസ്രായിൽ സൈന്യത്തിന് വൻ തിരിച്ചടി. മുതിർന്ന സൈനിക ഉദ്യോഗസ്ഥനെ കരയുദ്ധത്തിൽ ഹമാസ് വധിച്ചതായി സൈന്യം അറിയിച്ചു. 188-ാം കവചിത ബ്രിഗേഡിന്റെ 53-ാം ബറ്റാലിയന്റെ കമാൻഡറായ യാനൂ-ജാറ്റിൽ നിന്നുള്ള ലഫ്റ്റനന്റ് കേണൽ സൽമാൻ ഹബാക്ക (33)യാണ് കൊല്ലപ്പെട്ടത്. ഗാസ മുനമ്പിലെ ഐ.ഡി.എഫിന്റെ കരയുദ്ധത്തിൽ കൊല്ലപ്പെട്ട ഏറ്റവും മുതിർന്ന ഉദ്യോഗസ്ഥനാണ് ഹബാക്ക. ഗാസയുടെ വടക്കൻ ഭാഗത്തായിരുന്നു ആക്രമണം. ഇതു സംബന്ധിച്ച് കൂടുതൽ വിവരങ്ങൾ ഇസ്രായിൽ പുറത്തുവിട്ടിട്ടില്ല. കഴിഞ്ഞ 48 മണിക്കൂറിനുള്ളിൽ ഗാസയിൽ കൊല്ലപ്പെടുന്ന ഇസ്രായിൽ സൈനികരുടെ എണ്ണം ഇതോടെ 18 ആയി. 333 സൈനികരാണ് ഇതേവരെ ഇസ്രായിൽ സൈന്യത്തിന് നഷ്ടമായത്. നിരവധി സൈനികർക്ക് ഗാസയിൽ പരിക്കേൽക്കുകയും ചെയ്തു. ഈജിപ്ഷ്യൻ അതിർത്തിയിലുണ്ടായ ഏറ്റുമുട്ടലിൽ ബോർഡർ ഡിഫൻസ് കോർപ്‌സിന്റെ കാരക്കൽ ബറ്റാലിയനിലെ ഒരു സൈനികന് ഗുരുതരമായി പരിക്കേറ്റു. മൂന്നു സൈനികര്‍ക്ക് പരിക്കേറ്റുവെന്നാണ് ഇസ്രായില്‍ സൈന്യം അറിയിച്ചത്.
ഇന്ന് അതിരൂക്ഷമായ ഏറ്റുമുട്ടലാണ് ഗാസയിൽ നടക്കുന്നത് എന്നാണ് റിപ്പോർട്ട്. ഗാസയിൽ ഇതേവരെ 9061 പേരെ ഇസ്രായിൽ സൈന്യം കൊലപ്പെടുത്തിയതായി ഹമാസ് ആരോഗ്യവകുപ്പ് അറിയിച്ചു. ഇതിൽ 3760 കുട്ടികളാണ്. അതിനിടെ
ഗാസയിൽ നിന്ന് കൂടുതൽ വിദേശികളും ഇരട്ട പൗരന്മാരും വ്യാഴാഴ്ച ഈജിപ്തിലേക്ക് കടന്നു. യുദ്ധത്തിൽ തകർന്ന പ്രദേശത്ത് നിന്ന് പലായനം ചെയ്യാൻ ആഗ്രഹിക്കുന്നവർക്കായി തുടർച്ചയായ രണ്ടാം ദിവസമാണ് റഫ അതിർത്തി തുറക്കുന്നത്.
വിദേശ പാസ്പോർട്ടുകൾ കൈവശമുള്ള 100 യാത്രക്കാരുമായി രണ്ട് ബസുകൾ രാവിലെ ടെർമിനലിൽ പ്രവേശിച്ചു. സംഘം പിന്നീട് ഈജിപ്തിലേക്ക് കടന്നു. 60-ലധികം രാജ്യങ്ങളിൽ നിന്നുള്ള വിദേശികളെ ഗാസയിൽനിന്ന് ഒഴിപ്പിക്കും.
ഫലസ്തീൻ മേഖലയിലെ ഏറ്റവും വലിയ അഭയാർത്ഥി ക്യാമ്പായ ജബാലിയയിൽ ഇസ്രായിൽ നടത്തിയ ആക്രമണത്തിൽ രണ്ട് ദിവസത്തിനിടെ 195 പേർ കൊല്ലപ്പെട്ടതായി ഗാസയിലെ ഹമാസ് സർക്കാർ അറിയിച്ചു. 120 പേരെ അവശിഷ്ടങ്ങൾക്കടിയിൽ കാണാതായതായും 777 പേർക്ക് പരിക്കേറ്റതായും ഉദ്യോഗസ്ഥർ അറിയിച്ചു. ചൊവ്വാഴ്ചത്തെ ആക്രമണത്തിൽ ഒരു ഹമാസ് കമാൻഡർ കൊല്ലപ്പെട്ടുവെന്ന് ഇസ്രായിൽ സൈന്യം പറഞ്ഞു,
ഗാസയിലെ യുദ്ധത്തോടൊപ്പം അധിനിവേശ വെസ്റ്റ് ബാങ്കിലും അശാന്തി വർദ്ധിച്ചു. വ്യാഴാഴ്ച ഇസ്രായേൽ സൈന്യത്തിന്റെ വെടിവയ്പ്പിൽ മൂന്ന് ഫലസ്തീനികൾ കൊല്ലപ്പെട്ടു, ഫലസ്തീൻ വെടിവയ്പ്പിൽ ഒരു ഇസ്രായിലിയും കൊല്ലപ്പെട്ടു.
റാമല്ല നഗരത്തിനടുത്തുള്ള എൽ-ബിരേയിൽ ഇസ്രായിൽ നടത്തിയ റെയ്ഡിനിടെ രണ്ട് ഫലസ്തീനികൾ വെടിയേറ്റ് കൊല്ലപ്പെട്ടു. വടക്കൻ പട്ടണമായ കൽഖില്യയിലും ഒരു ഫലസ്തീൻ യുവാവ് കൊല്ലപ്പെട്ടതായി ആരോഗ്യ മന്ത്രാലയം അറിയിച്ചു.
തിങ്കളാഴ്ച 14 വയസ്സുള്ള ഒരു ഫലസ്തീനിയും ഇവിടെ വെടിയേറ്റ് മരിച്ചു, ഒക്ടോബർ 7 മുതൽ സൈന്യവുമായോ ജൂത കുടിയേറ്റക്കാരുമായോ ഉണ്ടായ ഏറ്റുമുട്ടലിൽ 130 ഓളം ഫലസ്തീനികൾ കൊല്ലപ്പെട്ടതായി ഹമാസ് കൂട്ടിച്ചേർത്തു.
