തൃശൂര്‍- തൃശൂരില്‍ ശക്തമായ മഴ രാത്രി വൈകിയും തുടരുന്നു. കനത്ത മഴക്കൊപ്പം കാറ്റും ഇടിയും മിന്നലും ഉണ്ട്. തൃശൂര്‍ വടക്കാഞ്ചേരി റെയില്‍വേ ലൈനില്‍ മരം വീണ് ഗതാഗതം തടസ്സപ്പെട്ടു. തുടര്‍ന്ന് കണ്ണൂര്‍ ഇന്റര്‍സിറ്റി എക്‌സ്പ്രസ് വടക്കാഞ്ചേരി സ്‌റ്റേഷനില്‍ പിടിച്ചിട്ടു. വണ്ടിപറമ്പ് പ്രദേശത്താണ് വൈകുന്നേരത്തോടെ പെയ്ത മഴയിലും കാറ്റിലും വലിയ ആല്‍മരം പതിച്ചത്. റെയില്‍വേ ട്രാക്കിനോട് ചേര്‍ന്നുള്ള പുറമ്പോക്ക് സ്ഥലത്തെ രണ്ടു വീടുകള്‍ക്ക് മുകളിലേക്ക് ആല്‍മരം കടപുഴകി വീഴുകയായിരുന്നു. അപകടത്തില്‍ അഞ്ചുപേര്‍ക്ക് പരിക്കേറ്റു. ഇവരെ താലൂക്ക് ആശുപത്രിയിലേക്ക് മാറ്റി.
കനത്ത മഴയില്‍ ചേലക്കര നിയോജകമണ്ഡലത്തില്‍ വിവിധ ഇടങ്ങളില്‍ മരം വീണ് അപകടമുണ്ടായി. മുള്ളൂര്‍ക്കരയിലും പാഞ്ഞാളിലും ദേശമംഗലത്തും മരം കടപുഴകി വീണു. മുള്ളൂര്‍ക്കരയില്‍ രണ്ടു വീടുകള്‍ക്കും കടകള്‍ക്കും മുകളിലൂടെ മരം വീണു നിരവധി പേര്‍ക്ക് പരിക്കേറ്റു. പാഞ്ഞാളില്‍ പൈങ്കുളം സെന്ററില്‍ മരം വീണ് ഗതാഗതം സ്തംഭിച്ചു. തിരുവഞ്ചിക്കുഴി ഭാഗത്ത് 3 വാഹനങ്ങള്‍ക്ക് മുകളിലൂടെയും മരം വീണു. സംഭവത്തില്‍ ആളപായമില്ല.
